Shillong, Nailur 12: U Myntri Rangbah ka Jylla Conrad Kongkal Sangma hynne ka sngi nyngkong, ula khot ia u Chief Whip ka Liang Pyrshah All India Trinamool Congress (AITC) bad MLA ka Umroi Bah George B Lyngdoh da u “Menthok” namar ka jingkynnoh ba ka Sorkar ka khlem iasyllok bad ki kynhun bapher bapher haba iasoi ia ka Memorandum of Understanding (MoU) bad ka Assam ban pynbeit ia ki hynriew tylli ki jaka ba iakajia hapdeng ki ar jylla.
Kane ka la lam sha ka jingiatai nia kaba khluid bha hapdeng kine ki arngut ki Nongmihkhmat paidbah hapoh ka Dorbar Synrai jong ka Iingdorbar Thaw Ain.
“Ka long kaba sngewsih ba u Dkhot (GB Lyngdoh) ula ialam bakla ia ka IIng bad Nga ong da kaba shai ba ka dei kaba shu thok” ong u Conrad haba kynthoh ia ki jingkynnoh une u MLA ka Umroi ba kam shym la don ka jingiasyllok bad ki kynhun bapher bapher ha ka jingiapynbeit pud jong ka wat ba nyngkong.
Une u Chief Whip ka Liang Pyrshah ula ong ba dei tad hadien bala pyndep ia ka wat ba nyngkong ba ki Hima bad kiwei kiwei ki kynhun kila pyrshah ia ka jingiasoi ia ka MoU bad ia ki jaka bala aiti sha ka Assam da ka Sorkar Jylla.
U Myntri Rangbah ula ong “Ha ka jingshisha, ka jingiakren pynbeit pud jong ka wat ba nyngkong kala iaid ha ryngkat ka jingiasyllok ba bunsien bad ki kynhun bapher bapher bad ka dei ruh ka sien ba nyngkong ba ki Myntri Sorkar bad ki Heh Ophisar kila leit sha ki Iing ki thaw bad pynlong ia ki jingialang paidbah ka bym pat ju leh mynno mynno ruh”.
Haba kyntu ia une u MLA ban kiar na ki jingkren kiba ialam bakla, u Conrad ula ong “Phi la don hapoh ka Iing, Kane kam dei ka jingiakynduh bad ki lad pathai khubor, ta ka daw long shai bha ia ki jingshisha. Kane kam dei ka lynti ban leh kum u dkhot ba don jingkitkhlieh. Nga kyntu ia u Dkhot ban nym ialam bakla bad ialam lynti bakla ia ka Iing”.
Kat kum ka jingong jong u, ka Sorkar kala dep ban iasyllok shuwa ba ki kynhun bapher bapher kynthup naduh ki District Council,ki Sengbhalang bad kiwei kiwei ha ka jingiakren pynbeit pud jong ka wat ba nyngkong.
Haba pynphai kylla, u Bah George ula kyntu ia u Myntri Rangbah ka Jylla ban kiar ha kaba pyndonkam ia ka kyntien “ki Dkhot ka Iing ki thok” bad pynkynmaw ia u ba um lah ban shu kynnoh ia ki Dkhot kat kum ki kyndon pyniaid Dorbar.
U MLA ka Umroi ula ong ba ka KHADC kala mynjur ia ka Resolution ban pyrshah ia ka jingiasoi MoU. “Ngi don ia ki shithi na ka Hima Mylliem ba pyrshah ia ka MoU. Ngi don ruh ki briew kiba la ieng pyrshah da kaba ong ba kim kwah ban leit sha Assam. Ban khot ia nga u ‘Menthok” ka biang hynrei ka shong ha ki paidbah ba kin bishar” ula bynrap.
Une u Nongialam ka AITC ula buh jingkylli ruh balei ba u Myntri Rangbah ka Jylla u kem bitar ia u namar ka jingkren ia ki jingshisha.
“Nga kwah ban kyrpad ia ka Sorkar kumba la kyrpad myn nyngkong ba kan wanrah ia ka draft MoU hapoh ka Iing dorbar hynrei la kyntait bad namar kane kiba bun ki jaka ngi la shu duh ei.Mynta ka kynti jong ka Wat ba nyngkong, ngi kyrpad ban sngap lang ia ki Dkhot ka Iing khnang ban gin ioh iatai bad peit ia ki jingshisha baroh shuwa ba ka Sorkar kan jam shakhmat ban iasoi biang ia ka MoU baa r” ong u Chief Whip.
Halor kane, u Myntri Rangbah ka Jylla ula ong ba ka daw ba u ong ba u Dkhot ka Iing u thok ka dei namar ka jingong ba ka Sorkar ka khlem iasyllok bad ki kynhun bapher bapher.
U Conrad ula kular ruh ba ha ka wat ba-ar, ka Sorkar kan sa iasyllok biang ia baroh ki kynhun hashuwa ban pynbeit ia ki jingiakjia ha ki hynriew tylli ki jaka ba dang sah.
Ha kajuh ka por, u Myntri Rangbah ka Jylla ula kyntu ia ki Dkhot ka Liang Pyrshah ban nym leh Politics ia ka kam iapynbeit pud.
