Guwahati, K’lyngkot 24 :Ki kynhun seng lehnoh ba la shah khein beain kiba kynthup ia ka United Liberation Front of Asom (ULFA-I), ka NSCN bad ka GRPN ki la khot pynlong da ka pakhang shnong kaba 18 kynta ha baroh ka thain shatei lammihngi (Northeast) ha ka 26 tarik mynta u bnai.
Na ka liang ka ULFA-I ka la kyntu ia ki paidbah ba kin shongkhop ha la ki jong ki iing ki sem shibynta ban pynpaw ka jingpyrshah ha katei ka sngi rakhe ‘Republic Day’.
Lyngba u kyrwoh kitei ki kynhun seng ki la kynthoh pyrshah halor ka jingrakhe ia ka sngi R-day, bad kyrpad ia baroh ba kin ym iashim bynta ha kane ka jingrakhe.
“Hynrei ia ki jingtreikam kiba kongsan, kum ki kam aijingiarap, ka tnat ka koit ka khiah, ka tnat bording, ki kam pynpoi um, ki tnat pynlip ding bad ki lad pathai khubor la pyllait na kane ka jingkhang pyrshah,” ong ka khubor na kitei ki kynhun.
Lah ban kdew ba ka kynhun jong ki hynriew tylli ki kynhun seng lehnoh ba khlainbor hapoh ka lama jong ka Coordination Committee (CorCom) ki la pynbna ban ym iashim bynta ha kane ka jingrakhe Republic Day ka ban long ha ka 26 tarik mynta u bnai da kaba khot ia ka pakhang shnong kaba 18 kynta hapoh Manipur, kata ka ban sdang naduh ka shiteng synia jong ka 25 tarik mynta u bnai.
Ka CorCom ka don haduh hynriew tylli ki kynhun seng kieng atiar ba la shah khein beain kaba kynthup ia ka KCP, KYKL, PREPAK, PREPAK (Pro), RPF bad ka UNLF kiba la iakhun na ka bynta ban ioh ia ka jingsynshar hi hapoh Manipur.
Hynrei, watla katta ym shym la khang ha kaba iadei bad ki jingleh niam, ki jingtreikam ka tnat ka koit ka khiah, ki kam sam um bad ki kam ba kyrkieh ha kane ka jingkhot pakhang shnong.
Da kaba pynpaw ba ki nongshong shnong ka Manipur kim don daw ban ia lehkmen halor ka jingioh iala ka jong ka jylla ba pura hapoh ka jingkhmih jong ka sorkar India bad ba kim dei ban iashim bynta ha ka jingrakhe R Day, ka jingthoh jong ka seng ka pynkynmaw ba ka histori kaba la leit noh ka pynshisha ba ka ‘Manipur/Kangleipak’ ki dang iai long ka ri kaba laitluid bad ba ka la ioh ia ka jinglaitluid na ka jingsynshar jong ka British ha ka snem 1947, kata shi sngi shwa ka India, hynrei kam shym la dei da lei lei ruh ka bynta jong ka ri India.
