Shillong, Naiwieng 27: Ka seng CSWO ryngkat bad ka TUR kila pyntip ba kin pynlong iaka jingialang haka 28 tarik mynta u bnai ha Nongbah Shillong ban iatai halor ka hok, ka bishar bad ka jingsuk bad ban ieng pyrshah ia ki kam pynmynsaw bad kam pyniap briew la kadei ba leh da ki bor sorkar ne ki bym dei ki bor sorkar.
Ka nongialam ka CSWO ka Kong Agnes Kharshiing bad ka Nongialam ka TUR ka Kong Angela Rngad, kila pynpaw iaka jingdiaw halor ka jinglong jingman ka nongbah bad ka jylla baroh kawei, khamtam halor ka jingjia Mukroh, West Jaiñtia Hills ha kaba hynriew ngut ki briew ki la iap ha ka jingsiat pathar jong ki Pulit Assam.
“Hadien kane kila don bun ki jingpyrshah paidbah halor kane ka jingjia ha kylleng ki jaka bad khamtam eh ha ka nongbah Shillong. Ngi sngewkhia ka mynsiem ba ki don ki riewshitkhlieh bad riewshimkabu kiba kwah ban thaw jingkulmar bad pynkha ia ka jingiakynad jaidbynriew kiba la tied la bom ia ki briew kiba lui lui kiba iaid ha lynti ha syngkien ki bym tip eiei ia ka duh ka dang” la pynpaw kitei ki nongialam.
“Kumba ka long kine ki riewshimkabu ki lait na ka jingpynshitom jong ka Aiñ bad ym ju don ka jingbishar bad jingpynshitom ia ki nongleh be-aiñ” kila ong.
Kine ki Nongialam kila bynrap ba kane ka jinglong jingman ka buh ia ka imlang sahlang, ka treikam treijam bad synshar khadar ha ka jingma ba khraw.
“Balei ka long kumne…. ka long ba ngim ju buh jingkylli ia kine ki riewshim kabu bad ia ki bor sorkar bad bym dei sorkar kiba pynksan ia kum kine ki riew bymman. Ka por kala dei ba ngin ieng ban pynrem, ban kren ia ka jingshisha, ban iatai bad ba ym dei shuh ban shah ba kane kan iai jia” kila ong.
Kila khot bad iawer ia ki paidbah ban wan sha ka jingialang kaban long ha Don Bosco Youth Center, Laitumkhrah ha ka por 2 baje mynsngi, na ka bynta ban ia tai bniah halor ka hok, ka bishar bad ka jingsuk bad ban ieng pyrshah ia ki kam pynmynsaw bad kam pyniap briew, la kadei ba leh da ki bor sorkar bad bym dei sorkar.
