Shillong, Jymmang 04 : Namar ka jingiakhih jong ki nongtrei ki skul bad college deficit pyrshah ia ka Provident Fund scheme ba thymmai, ka Sorkar Jylla kala khot ia ki nongialam jong ki kynhun ba don bynta sha ka jingiakren ban “sngewthuh kham bha ia ki jingeh ba ki don bad ban wad ia ki lynti ba lah ban pynbeit”.
“Ka Sorkar Jylla ka da kut jingmut shisha ban pynbeit ia ka jingeh jong baroh ki kynhun ba don bynta ha ka lynti kaba tei. Halor kane, ka Tnad Education kala khot ia ki nongialam jong ki seng ba don bynta sha ka jingiakren ban iasngewthuh khambha ia ki jingeh ba ki don bad ban wad ia ki lynti ka lah ban pynbeit ia kine ki jingeh” ong ka kyrwoh bala pynmih da u Commissioner & Secretary ka tnad Education Vijay Mantri ha ka sngi Nyngkong.
“Ia kane ka jingialang la buh ban pynlong ha ka 6 tarik Jymmang ha ka por 3 baje janmiet hapoh ka Main Conference Hall, Secretariat” kala bynrap.
Kane ka jingkhot iakren kala mih hadien ba ki nonghikai deficit kila pynlong ia ka poster campaign ha baroh kawei ka Jylla, ba kyntait ia ka Meghalaya Non-Government School and College Employees Centralised Provident Fund Scheme, 2026, haba khot ia ka kum ka “CPF thok” bad dawa ban phai biang sha ka draft 2023”.
Haba shimkhia ia ka jingpyrshah, ka Tnad ka ong “Ha kajuh ka por, ki don ruh ki jingsngewkhia bala pynsngew da ki katto katne ki nongtrei, khamtam hapdeng ki jaka pule deficit”. Ka Tnad ka pynpaw ba kane ka kam mynta ka don hapoh ka jingbishar ka Iingkashari.
“Ka kam ia mynta ka long sub-judice hakhmat ka Iingkashari Meghalaya High Court, bad ka Sorkar kala dep ban aiti ia ka scheme bala dep pynbna sha ka Iingkashari bad ka dang ap ia ka rai jong ka” ong ka kyrwoh.
Haba pynksan ia ka scheme, ka tnad ka ong ba kala dep pynmih jingpynbna “da ka jingthmu ban pyn thikna ia ka jingpahuh pisa bad jingiada ia palat 30,000 ngut ki nongtrei jong ki skul bad college ki bym dei jong ka Sorkar ha kylleng ka Jylla”.
“Ka scheme ka ieng kum ka jingpynkylla kaba kongsan ha ka kam pule dangle naba ka ai ia ka provident fund bala pynbeit ryntih bad ka pension sha ki nongtrei bapher bapher, kynthup ki nonghikai deficit bad ki lecturer, nonghikai adhoc, SSA , RMSA, Hindi, Science Grant, pre-Primary nalor ki nongtrei ki bym dei ki nonghikai kiba don ha ki kyrdan bapher bapher” kala ong.
“Da kaba wanrah ia baroh ki kynhun hapoh kawei ka rukom treikam bala pyniaid kat kum ki kyndon, ka scheme ka thmu ban kyntiew ia ka jingiaryngkat, ka jinglong shai bad ka jinglong ba iai neh” bynrap ka Tnad.
Kala pynpaw ruh ba ka jingkynthoh ka long kaba ai mynsiem haduh mynta.
“Ka long kaba sngewdei ban pynpaw ba bun bah ki nongtrei kila pynpaw ia ka jingsngewtynnad ia kane ka skhim, bad ka kam ban plie ia ka Permanent Retirement Account Number (PRANS) kala dep sdang ha kiba bun ki bynta jong ka Jylla” ong ka kyrwoh.
