Shillong, Risaw 31 : Ki Pulit ka Shillong Sadar Police Station bad ka Laitumkhrah Police Station, kila khot hajir ia ki arngut ki Nongialam ka FKJGP halor ka huri hura kaba mih na ka jingiaid rally halor ka jingkyrduh kam ki samla, kaba long myn ha ka 28 tarik u Risaw.
Kine ki arngut ki Nongialam ka FKJGP ki dei u Bah Eldie Newton Lyngdoh General Secretary ka FKJGP bad u Bah Elton Cliff Warjri, Senior Vice President ka FKJGP.
Kine ki arngut ki Nongialam ka FKJGP kila shah pynngat case halor ka huri hura kaba mih na ka jingiaid rally, ha kaba don ki briew kiba tap durkhmat, kila shoh ia ki nongiaid nongieng bad pynjulor ruh ia ki kali khamtam ki kali arshaka.
Kat kum ka shithi khot hajir, ka Laitumkrah Police Station kala khot hajir ia kine ki arngut ki Nongialam ka FKJGP lashai ka sngi ka 1 tarik Naiwieng katba ka Shillong Sadar Police Station kala khot hajir ha ka 4 tarik u Naiwieng.
Kine ki shithi khot hajir kila pynpaw shai ba ki Pulit ka Laitumkhah Police Station kila register case ia kine ki nongialam ka FKJGP hapoh ka kyndon 341/324/353/505//506/34 IPC katba ka Sadar Police Station kila register case hapoh ka kyndon 120 (B)/141/323/341/353/427/505/506/ bd 34 IPC.
