Shillong, Nailur 22 : U Myntri uba khmih ia ka tnad jngohkai Bah Paul Lyngdoh ha ka sngi Thohdieng ula ong ba ka tamasa Cherry Blossom mynta ka kynti ka dei kaba la khmih lynti ba kan pynmih pisa kumba T.2 Klur na ka jingdie tiket.
“Mynta u snem, ngi khmih lynti ban pynmih pisa na ka jingdie tiket haduh T.2 Klur ka ban shong katkum ka jingdon jong ki kynhun kiban pynbyrngia (performers) kaba dang iapynbeit” ong u Bah Paul Lyngdoh haba jubab ia ka Zero Hour Notice kaba la wanrah da u MLA ka North Shillong Bah Adelbert Nongrum hapoh ka iingdorbar.
U Bah Nongrum ula kwah ban tip naei ka sorkar kan pynioh ia ka pisa na ka bynta ka tnad jngohkai ba kan pynlong ia ka tamasa cherry blossom ha India bad Thailand naduh ka 1 tarik u Risaw haduh ka 30 tarik bad iaka cherry blossom mega music contest ha ka 17 tarik u Naiwieng.
U Bah Lyngdoh ula ong, ba donkam ban buh jingmut ba kine ki tamasa kim dei eh kiba bei tyngka lut da ka sorkar Meghalaya hynrei kadei kaba la pynmih ia ka pisa lyngba ka jingdie tiket kaban kot T.1.25 klur shwa ban long ka tamasa. Nalor kane yn ioh ruh ia ka synniang pisa ba T.1 Klur na ki kompani.
Ula pyntip ba mynta u snem ka cherry blossom festival ryngkat bad ka Mega Music Contest ka long da ka jingthmu ban saindur bad plie lad ia ki samla donsap ka Jylla ha ka karkhana ka put ka tem, yn pynlong ruh ia ka choir competition ban plie ia ka rynsan na ka bynta ki choir bad ki kynhun rwai jong ka jylla ban pyni ia ka sap ka phong jongki. Kadei ka lad ia kine ki kynhun kiba donsap ban ioh iaka jingithuh bad jingburom na ki paidbah ka jylla bad kumjuh na ki nongpeitkai kiba wan nabar.
U Myntri ula ong, ba ka Cherry Blossom Festival ha u 2021, kala khring haduh 45,000 ki paidbah ha kaba 25% kidei ki nongjngohkai, kaba ia ryngkat ia palat 10,000 ngut ki nongjngohkai tang ha ki 3 sngi.
Nalor kane ka Megong Festival kaba la pynlong ha u snem ba la dep kala khring haduh 3.5 lak ngut ki briew.
Katkum ka jingdon ia ki jingtip na ka tnad sorkar, kaba bun na ki ticket ka dei kaba la die ha u snem 2022 ka leit sha ki nongjngohkai.
Shuh shuh kiba bun ki jaka sah kila dap lut ha ka por ba don ka tamasa kaba la lah ban pynmih shuh shuh ia ka khajna ha ka jylla bad nalor kane, ki trai jylla ruh kila ioh kamai da kaba buh ia ki dukan bad ki dukan bam, ka jingkamai ki kali bad kiwei kiwei.
Ula ong ba ia ka “Curtain Raiser” bala pynlong ha ka ri bad shabar ka ri la leh da ka jingthmu ban kyntiew ia ka jingdie ia ki tiket bad ban khring ia ki nongjngohkai kiba heh.
U Bah Paul Lyngdoh ula pynshai ba ka sorkar kan bhah kumba T. 7.5 klur ban pynbiang ia ki jingdonkam baroh ha ka tamasa hapoh jong ka Expenditure Head 104, ka jingkyntiew bad jingpathai ia ki jingtip kaba la ioh iaka jingmynjur na ka iingdorbar ha ka dorbar mang tyngka kaba la.long ha u Lber. Ka jinglut jingsep ha kaba iadei bad kine ki tamasa yn pynlut lyngba katei ka jingbhah tyngka.
