Dang iakren bad ka Malaysia, Bangladesh ban pynkhlain iaka IT
Tura, Jymmang 25 : U Myntri Rangbah ka Jylla Conrad K Sangma ha ka sngi Thohdieng ula ong ba ka Jylla kala khmih lynti ban khring ia ka jingwan kynshew kam ki kompani shimet kaba kot haduh T.8000 klur hapoh ka Jylla.
Ula ong ba kane ka jingkynshew kam kaba heh bha kan synniang sha ka jinglah pynurlong ia ka thong ban kot ia ka 10 billion US dollar economy.
“Ka jingkynshew kam ha Meghalaya ka dei u soh jong ka Industrial Policy ba thymmai kaba la pynsuk ban leh ia ki kam ki jam” ula ong haba kren ha ka workshop “Human Development Leadership Programme” ha Tura, kaba la iashimbynta da ki DC, BDO bad ki Ophisar ki District bad ki Block jong ki san tylli ki district ka Ri-lum Garo.
Haba kren halor ki policy bad ki jingrit mynsiem jongki nongkynshew kam, ula ong “ Ka rukom treikam ha ki snem bala leit ka long kaba suki bad bam por bha. Ka Industrial policy ba thymmai jong ngi kala ai ka rynsan ban ai jingbit ia baroh ki jingdonkam hapoh ka por bala buh, kaban iarap iaki nongsengkam”.
U Conrad ula ong ba jan T.4000 klur ka jingkynshew kam kala wan ha kane ka shisnem bala leit noh ba kynthup ia T.2500 klur ka Thermal Power Plant ban pynmih ia 450 Mega watt ka bording, ka Ethanol Plant, Beverages bad ki Hotel Five Star.
Ban pynkhlain ia ka lad pyniasoh IT ha ka Jylla, u pyntip ba ka Sorkar kala iakren bad ki kompani telecom ka Malaysia bad Bangladesh ban leh da ka submarine cable line. “Ka jingpyniasoh da ki optical fibre kan nang pynkhlain ia ki jingtreikam kiba iadei bad ka IT” ula ong.
U Myntri Rangbah ula pyntip ruh ba kin dang don shuh shuh ki Five Star Hotel project ki ban dang wan ha Shillong, Sohra bad Umiam bad kumjuh ruh ka Three Star Hotel ha Tura, kiban wan lyngba ki riew shimet. Ula ong ba kine ki hotel kin nang kyntiew ia ki kam business bad kin ai ruh ia ka lad iohkam iohjam ia ki samla.
“Ki Hotel, ki lad pyniasoh na suin, ka high speed internet kan pynshlur ia ki IT company ba kin buh ia ki Ophis treikam hapoh ka Jylla. Ka Shillong IT Park kala ai kam ia palat 3000 ngut ki samla bad bun ki kompani kila pynpaw ia ka jingkwah ban buh ia ki BPO ha Jylla” ula ong haba pyntip ba ha ka phase-II jong ka Shillong IT Park, ka ban pynkha ia ka kam ba 3000 ngut, ka dei kaba la pynthikna da ka IT company na USA bad ki Ri ka dewbah Europe.
“Ki kompani mynta kila phaikhmat na ki jaka sor kum ka Bengaluru bad Hyderabad sha ka Jylla jong ngi namar ki tip ba ngi don ia ki briew kiba tbit ban trei ia ka kam. Ki briew jong ngi ki tbit bha ha ka ktien ka thylliej, bad kiba trei shitom, kaba dei ka jingmyntoi ia ngi” ong u Myntri Rangbah.
