Jowai, Jymmang 24 : U District Magistrate ka West Jaintia Hills, ula pynjari da ka kyndon 144 CrPC hapoh ka District ba khang ia ka jingtih khyndew be-ain, kaba ktah ia ki catchment area jong ka Wah Myntdu.
Kane ka hukum kala mih halor ka jingkylla rong ka um hapoh ka Wah Myntdu bad ki wahduid ba tuid namar ka jingktieh kaba dei na ka daw ka jingtwa khyndew bad jingwan tuh ki jaboh jabain kiba lang ha ki Cathment area ba don ka jingtih marpoh khyndew beain bad jingtih khyndew na ka jingshna surok ka Tnad PWD.
Ka hukum ka ong ba ka Tnad PWD ha ryngkat u contractor ki dei ban pynthikna ba ka jingshna ia ka surok ka dei ban sangeh noh katbym pat shim ia ki sienjam ki ban khang ia ka jingtuid ka khyndew sha ka wah Myntdu. La bthah ia ka PWD Roads, Central Division ba kan shim mardor ia ka sienjam ha kaban lah pynkhuid pat ia ka wah.
Ka hukum kala khang pyrshah ruh ia ka jingkhlong shyiap bad ka jingtih maw ha shi lynter ka wah Myntdu.
Kala mana ruh ban iasait jain, sait kali, bret jaboh jabain ha shilynter jong ka wah Myntdu.
