Shillong, Iaiong 15 : U MP ba marwei ka Jylla sha Rajya Sabha Dr WR Kharlukhi ha ka sngi ba-ar ula ong ba khlem ka jingdon nongmihkhmat ba khlain na ka thain Shatei Lam Mihngi, kan long kaba shitom ban pynbor ia ka Sorkar Pdeng ba kan pyntreikam noh mardor ia ka Inner Line Permit (ILP) bad pynrung ia ka ktien Khasi bad Garo ha ka khyrnit ba phra jong ka Riti Synshar ka Ri.
Haba kren sha ki nongthoh khubor, u Dr Kharlukhi ula ong ba ka Iingdorbar Thaw Ain ka Jylla kala mynjur da kawei ka sur haba ia ka resolution ba iadei bad ka ILP bad ka ktien Khasi bad Garo bad na ka liang jong u, ula ju kren ia kine ki kam nalor kiwei ki MP na kiwei ki Jylla ha Parliament na ka por sha ka por.
“Hynrei, kaei kaba nga ong shi iai ong ka long ba tad ynda ngi la don bun ki nongmihkhmat n aka thain, ngam iohi ba ngin ioh ia uno uno u soh” ula ong.
“Ngam tip shuh, ngi la tynruh shi tynruh hynrei ka Sorkar Pdeng kam ai satia. Ngi donkam ia ka jingdon bun ki nongmihkhmat ha Parliament kaba ngi la pyrshang kum ka NPP hynrei ngim ioh satia..ngi don ia ki MLA hynrei ym ki MP. Kan long kaba eh shibun katba ngim pat don ia ka sur kaba khlain” ula bynrap.
Haba kylli, u Dr Kharlukhi ula ong “Em, ka Arunachal Pradesh, Nagaland kila ioh la slem bha. Ka Manipur kala ioh dang shen bad ka Sorkar India kala ong ba dei namar ba kim don ia ki District Council lane kumta hi bad kumta kala ai iaka ILP. Ka ILP dei naduh ka por ba synshar ka ri Bilat bad ha ka por ka Sorkar Bilat, ka ILP ka long ban iada ia ki briew ban wan na shabar sha ki jaka jong ngi hynrei mynta kala iapher, ka long ban iada ia ki riewlum”.
 bad pynrung ia ka ktien Khasi bad Garo ha ka khyrnit ba phra jong ka Riti Synshar ka Ri.){kind=link}