Guwahati, Naitung 23:Ka jingkhlad jong uwei pat na ka jingpang Japanese Encephalitis (JE) ha Assam ka la kyntiew ia ka jingdon jong baroh ki ba iap na kane ka jingpang sha ka 38 ngut mynta u bnai.
Kane ka jylla ka la sakhi halor ka jingdon jong ki 15 ngut ki ba dang shu ioh thymmai ia kane ka jingpang, ka ba la kyntiew sha ka 251 ngut baroh.Kane ka jingkhlad ba dang shen ka la jia hapoh Biswanath district ha kine ki 24 kynta ba la dep, ong ka khubor sorkar.
Katkum ka NHM, naduh ka 1 tarik u Naitung, haduh kumba 38 ngut ki briew ki la iap bad 238 ngut ki la shah ktah ha kane ka jingshitom ha palat 20 na ki 35 tylli ki district ka jylla.
Da ka jingpynmih hukum da ki bor ba halor ka NHM, la thaw ia ka kynhun District Rapid Response Team na ka bynta ban peitngor bad bishar bniah ha ka ba iadei bad ka jinglong jingman bad ruh ban shim ia ki lad jingiada.
Ka jingpang Japanese Encephalitis bad ka khieshohrih ne malaria ka la wanrah ka jingiap jong ki ba bun bah ki briew ha ka jylla Assam man la ka snem, kata khamtam ha ka por lyiur, bad kane ka jingpang ka ju sdang naduh ki bnai Jymmang bad bteng haduh u bnai Risaw.
Na ka liang u Principal Secretary ka tnat ka koit ka khiah, u Avinash Joshi ha ryngkat ka director ka NHM, ka M.S. Lakshmi Priya ki la bishar bniah ha ryngkat ki bor pyniaid jong ki district da ka ba kyntu ruh na ka bynta ban long ki ba la pynkhreh ban shim ia ki lad ki lynti ban tehlakam ia ka jingsaphriang jong kane ka jingpang.
Shuh shuh na ka liang ka NHM ka la pynmih ruh ia ki kyndon treikam ba pyrkhing na ka bynta ban tehlakam halor kane ka jingkiew ha ka jingdon jong ki briew ki ba shah ktah ha kane ka jingpang Japanese Encephalitis.
Na ka liang ki nongtrei ka tnat ka koit ka khiah ki la pynlong ruh ia ki jingpynshai paidbah ha ka ba iadei bad kane ka jingpang Japanese Encephalitis.Ha ka snem ba la dep ki la don kumba 40 ngut ki briew ki ba la khlad noh na kane ka jingpang JE, ong ka khubor heh sorkar.
Kane ka jingpang JE ka dei ka ba saphriang lyngba ki skain pyrjong ki ba kit ia kane ka jingpang, kata khamtam ha ka por lyiur.
