Sngewlem ka Wangala Festival Committee
Tura, Risaw 06 : U Nongshem ba im khatduh eh jong ka 100 Drums Wangala Festival, u Leander K Marak, ula khlad noh hynne ka sngi ha Ri-lum Garo.
Une u riewkhraw ka kolshor uba don ha lyndet ka tamasa ba heh tam jong ka riti dustur ki Garo, ula khlad hala iing ha Tura hadien ka jingiakhun bala slem ia ka jingpang ha ka met.
U Leander K Marak u dei uwei na kiba nyngkong bad uba khatduh eh na ki nongshem jong ka 100 Drums Wangala Festival kaba la sdang na madan Asanang ha Rongram, kaba jngai kumba 18 km na Tura, ha u snem 1976.
Ia kane ka tamasa la pynlong kum ka jingleh rukom ba manla u snem ban iada bad pyninam ia ka riti dustur ba riewspah jong ka jaidbynriew Garo.
U Leander ula ialam ia ka Committee la palat 20 snem ha kaban pynlong ia kane ka tamasa kaba hehduh jong ki Garo-nyngkong eh ha Asanang kaba la neh haduh 40 snem bad dang shen la pynkynriah sha ka jaka ba shirta bala khot ka Wangala “A’dam” kaba don ha Chibragre, harud ka wah Ganol.
Na ka liang ka 100 Drums Wangala Festival Committee kala pynpaw ia ka jingsngewlem bad jingsngewsih halor ka jingkhlad noh une u riewkhraw ka riti dustur jong ki paid Garo.
Ha ka kyrwoh, u Purno K Sangma, na ka bynta ka 100 Drums Wangala Festival Committee, ula phah ia ka jingsngewlem sha ki bahaiing hasem haba duwai ba ka “Mynsiem jong u kan ioh ia ka jingjah thait ba junom”.
