Shillong, Nailar 16 : U Myntri Rangbah barim ka Jylla ia uba la ju khot ruh kum u “Mr Clean” ha ka jylli sain pyrthei ka Meghalaya, Salseng C Marak, ula khlad noh hynne ka sngi Thohdieng ha ka rta kaba 83 snem.
U Salseng C Marak, ula pyrsad mynsiem khatduh hapdeng ka jingsumar ha Tura Civil Hospital. Ia u Salseng la kha ha u snem 1941.
U Salseng u dei u Nongialam ba radbah jong ka Indian National Congress (INC) bad u dei uba mihkhmat kum u MLA jong ka Resubelpara.
U Salseng ula shah thung nyngkong eh kum u Myntri Rangbah ka Jylla ha u snem 1993 ha ka jingsynshar ka Sorkar synrop ba ialam da ka Congress. Kum u Myntri Rangbah ba hynriew ka Jylla, u dei u Myntri Rangbah ba nyngkong eh ban ioh bat ia u lakam ka jingsynshar kaba neh baroh san snem pura.
U Salseng u dei uwei napdeng ki nongialam sain pyrthei ba ia burom bha ha Jylla namar ka jingkhuid jong u kum u nongialam ha ka synshar khadar bad ka kam sain pyrthei.
U Salseng u dei ruh ula bat ia ka record ban ioh shong shuki ba khyndiat por eh kum u Myntri Rangbah ka Jylla kaba neh tang 12 sngi ha u snem 1998, kaba pynkhein ia ka record ba bat da u Bah BB Lyngdoh jong ka Sorkar ki seng Riewlum ba neh tang 30 sngi hashuwa ba kan shah pynkhyllem ha u snem 1988.
Ha u snem 1998, u Salseng ula shah jied kum u Myntri Rangbah ka Jylla ha ka 10 tarik Lber,1998 hynrei ula ioh ban shong ha ka shuki tang 12 sngi namar ka jingiapait iapra noh jong ka kynhun synrop, kaba plie lynti ia ka Nongialam ka United Parliamentary Forum Bah BB Lyngdoh ban shimti ia ka shuki Myntri Rangbah ka Jylla.
U Salseng C Marak u dei ruh uwei na ki riewsain pyrthei uba ju kren bha pyrshah ia ka jingiadon jingiadei hapdeng ki seng kaikhlaw bad ki riew sain pyrthei.
U Salseng C Marak u la bat teng ruh kum u President jong ka Meghalaya Pradesh Congress Committee (MPCC) ha u snem 2003.
U Myntri Rangbah ka Jylla Conrad K Sangma, ula thoh ha X (Twitter barim) ban pynpaw ia ka jingsngewsih halor ka jingkhlad noh u Salseng. Ula ong “Sngewsih kthang ban ioh khubor ia ka jingkhlad noh u CM barim Salseng C Marak. Ka synniang jong u sha ka roi ka par ka Meghalaya kan dei ka ban ia kynmaw beit. Ngaphah ia ka jingsngewlem sha ki bahaiing hasem bad ki baieid bathoin jong u. Ai ba un ioh ia ka jingjahthiah ka bym ju kut”.
Deeply saddened to learn of the demise of former CM Salseng C Marak. His contributions to Meghalaya’s development will always be remembered. My condolences to his family and loved ones. May he rest in peace. pic.twitter.com/mj8sHGoMP9
— Conrad K Sangma (@SangmaConrad) August 16, 2024
