Shillong, Jylliew 26: U Chief Executive Member barim ka KHADC u Bah Teinwell Dkhar ula khlad noh hynne ka step jong ka sngi Balang.
U Bah Teinwell udei uba la shah jied 4 sien kum u MDC na ka Shella Constituency bad ula bat teng kum u CEM ka KHADC bad kiwei kiwei ki kyrdan haka Council.
Dang ha ki katto katne bnai kiba la dep u Bah Teinwell ula pynbna ruh ba un ym iakhun shuh ia ka elekshon MDC kaban wan bad pynpaw ba ym don satia ha ka met kaba koit kaba khiah.
U Bah Teinwell ula khlad ha ka por mynstep bad kane ka jingkhlad kala long ka jingduh kaba khraw ia ki nongialam, ki nongkyrshan ka UDP bad ia ka Council baroh kawei.
