Shillong, Jylliew 25 : U Nongialam ka NPP bad Myntri Sorkar Rakkam A Sangma ha ka sngi Ba-ar ula maham ba kano kano ka jingpynkylla ha ka State Reservation Policy kan lam sha ka jingshah bishar bniah bha ha ka lynti ka Ain.
Haba iakren bad ki lad pathai khubor, u Rakkam ula ong ba ka long kaba donkam ban ap ia ki jingai jingmut jong ka Expert Committee bala thung da ka Sorkar halor ka State Reservation Policy.
“…Namar ki kyndon kiba shai bha jong ka Riti Synsahr ka Ri bad ruh ka hukum ka Iingkashari Supreme Court haba iadei bad ka jingbuh bhah ba 50% ha kano kano ka Jylla, nga sngew ba kano kano ka jingpynkylla (ia ka SRP) ka lah ban lam sha ka jingshah bishar bniah bha hakhmat ka Ain. Kumta, to ngin ap ia ki jingai jingmut ka Expert Committee. Hynrei lada jia eiei, kan dei ka jingduhnong kaba khraw ia ki paid riewlum trai Jylla jong ngi” ula ong.
“Shu khein ba lada dei ban pyntreikam ia ki kyndon ka Riti Synshar ka Ri bad ka hukum ka Iingkashari Supreme Court ba buh bhah tang 50%, kan dei ka jingduhnong kaba khraw ia ki riewlum trai Jylla ka Jylla. Haba ong kumta, to ngin ap ia ka Expert Committee ba kan ai jingmut sha ka Sorkar Jylla bad ngin sa peit kaei kaban mih” ula bynrap.
Haba kylli, une u Nongialam ka NPP ula kubur ba ka kam jong ka Reservation Policy ka dei kawei na ki daw ba hakhmat eh halor ka jingshah rem ka NPP ha ka elekshon Lok Sabha na baroh artylli ki constituency ka Jylla-ka Shillong bad Tura Parliamentary constituency.
