Guwahati, Nohprah 30: Ka Khaleda Zia, ka longkmie kaba nyngkong eh ban bat ia ka kyrdan Prime Minister ka ri Bangladesh kala khlad noh hynne ka sngi Bar ha Dhaka, hadien ka jingban jur jong ka jingpang.
Ka Khaleda Zia kala khlad ha ka rta kaba 80 snem.
Kadei ka nongialam jongka Bangladesh Nationalist Party (BNP) bad kala ialam ia kane ka seng la bun phew snem bad kadei ruh ka longkmie kaba nyngkong eh ha ka ri Bangladesh ban long ka Prime Minister.
Ka Khaleda Zia kala bat 3 sien ia ka kam Prime Minister ka Bangladesh bad kala don ruh ka jingiakhun kaba jur bad ka nongialam jongka Awami League ka Sheikh Hasina bad kane kala pynwnadur ruh ia ka jinglong jingman ka kam sain pyrthei hapoh ka ri Bangladesh palat ia ka 20 snem bad kila mih ruh ki jingiakhih bad kala don ruh ka jingshah ktah jur ia ka shongsuk shongsain hapoh ka ri.
La kha ia ka Khaleda Zia ha u snem 1945 ha Bengal ha ka por ba ka dang hap ha ri India bad hadien kane kala leit noh sha East Pakistan hadien ba la ioh ia ka jinglaitluid bad kala iashong kurim bad u Ziaur Rahman, u heh ophisar shipai uba la kiew ruh sha ka khet ban synshar kum u President ka ri Bangladesh hynrei ula shah pyniap noh ha u snem 1981.
Hadien kane, ka Khaleda Zia kala rung ha ka kam sain pyrthei bad kylla long kum ka durkhmat jongka BNP, ha kaba kala ioh ia ka jingkyrshan ki paidbah, ki kynhun bad kylleng ki constituency.
Ha ki snem kiba hadien, ka Khaleda kala mad ia ka jingeh ha ka jingim ka jongka da kaba shah pynngat ha ki mukotduma ki bapher bapher bad ka shah pynshitom ha ki ain bapher bad na ka jingban jur jongki jingpang bapher kala kiar noh na ka kam sain pyrthei hynrei kala iai bteng pat ban long kum ka shap kaba khlain bor na ka bynta ka seng bad ki nongkyrshan ki jongka.
Ki nongialam sain pyrthei, ki riewpawkhmat bad kiwei kiwei, kila pynpaw ia ka jingsngewsih bad kaj ingduh nong kaba khraw halor ka jingkhlad noh ka Zia bad kila iashimbynta ha kaban leh burom ia kane ka nongialam ba radbah jong ka ri Bangladesh kaba la saindur ia ka ri baroh kawei.
