Aizawl, Risaw 01 :Ki bor pulit ka Mizoram mynta ki dang pynlong ka jingtohkit halor ka jingkhlad noh jong iwei i khunlung kynthei iba dang ar snem rta halor ka jingsuba shah lehbor, ong u heh pulit.
Ine i khunlung iba dei na kawei ka shnong ha Aizawl ila khlad noh hapoh ka jaka sumar ha kane ka nongbah ha ka 16 tarik u Nailur ba la dep.
Na ka liang u SP ka Aizawl u C Lalruaia ula ong ba dang shen kila rejistar case hapoh ki kyndon jong ka Protection of Children from Sexual Offences (POCSO) hadien ba ki doktor kila lap ia ka jingshah ktah jong ine i khunlung hashwa ba in khlad noh.
“Ka jingtohkit halor kane ka jingjia ka dang iaid shakhmat.Haduh mynta ym pat shym la ithuh ia kino kino ki suba donkti halor kane ka jingkhlad jong ine i khunlung,” ong shuh shuh u heh pulit.
Nalor kata ula ong ruh ba ki pulit ki dang pyrshang ban wad ia ki sakhi satar ban pynshisha ba ine i khunlung ila ngat ha ka jingshah lehbor bad ba ka jingleh ia ki tes lyngba ki stad forensic ruh kam shym la lah ban pyni ia ki jingmih kiba pdiang hun khnang ban pyniaid ia ka jingtohkit sha kawei pat ka bynta.
Ha kawei pat ka bynta, na ka liang ka nongtreikam bhalang ba pawkhmat ka Mizoram ka Vanramchhuangi kala ujor pyrshah da ka First Information Report (FIR) hapoh police station ha ka thain sepngi ka nongbah Aizawl pyrshah ia ki kmie ki kpa jong ine i khunlung ha ka sngi Palei ba la dep.
U Lalruaia ula ong ba ia kane ka FIR kin dang rejistar. “Kala don lypa ka case ha ki pulit halor kane ka jingiap jong itei i khunlung, bad ka jingtohkit ka dang iaid shakhmat. Ngin dang rejistar ia katei ka jingujor da katei ka nongtrei kam bhalang pyrshah ia ki kmie ki kpa jong ine i khunlung,” ong u SP ka thain.
Ka Vanramchhuangi, ia kaba la tip bha kum ka Ruatfela Nu, kala ong ba kane ka jingujor FIR jong ka kala wan long hadien ba ym shym la don kiwei pat lait noh ki kmie ki kpa jong ine i khunlung kiba la shah suba jur halor kane ka jingjia.Kala kynnoh ba u kpa jong ine u khunlung u dei u nongleh kam bymman bad ka kmie jong i kaba la buhrieh ia ki jingshisha.
Kumta ruh na ka liang kane ka nongtrei kam bhalang kala kyntu ia ki bor ka ain ba ki dei ban kem noh mardor ia ki kmie ki kpa jong ine i khunlung bala khlad noh.
Shuh shuh ka Vanramchhuangi kala ong ruh ba kane ka kam pyntriem ba shyrkhei kaba lah ban dei lyngba ka jinglehbor ka hap hapoh ki kyndon jong ka POCSO Act, kata ha kaba dei ban kem mardor ia ki suba, kata lada ki don khlem da pynslem.
Ha ka sngi Palei ba la lah, ki pulit ka Mizoram kila lem noh ia laingut ki youtubers namar ka jingpynphriang ia ki khubor bym shisha ha kaba iadei bad ka jingkhlad noh jong ine i khunlung, kata da kaba pynmih ruh ia ka kyrteng jong i, ong u heh pulit.Hynrei la pyllait jamin noh ia kine ki laingut da ka district court ha katei hi kajuh ka sngi, ula bynrap.
