Shillong Risaw 14: Uwei u briew uba la noh ka rta ula khlad noh naka jingpluh jong kawei ka ïing building kaba don ha Thana Road hynne ka sngi.
Une uba la khlad noh la tip kyrteng kum u Sampat Singh Jangir.
Na ka liang ka Deputy Commissioner jong ka East Khasi Hills ka Kong RM Kurbah kaba don ha katei ka jaka kaba pluh kala pynthikna ba u Sampat Singh Jangir ula khlad noh.
Haba ki khubor kila saphriang ba kala don ka jingsuba jur baar ngut kila sahkut hapoh katei ka building, ki pulit pynlip ding kila ialeh katba lah ban tem ia katei ka ding hynrei hadien katto katne ka kynta kila ioh ban sei ia u Sampat bad la pynkit noh mardor ia u sha Civil Hospital Shillong.
Ki khubor kiba la iohlum, kila iathuh ba une u briew uba la sahkut hapoh u dei uba la rangbah bha ka rta bad ym lah ban iaid bha ban phet na katei ka ïing bilding kaba ki thylliej kila klang bha.
Ha ka por mynsngi kiba shong basah ha katei ka ïing, kila khuslai bad sheptieng bad kila suba jur ba ar ngut kila sahkut hapoh, hynrei hadien katto katne kynta la lap ba don tang uwei hi uba sahkut hapoh katei ka building.
Katei ka ïing building kaba la shah bamduh ha ki thylliej ding kadei kaba longtrai da u Govind Singhania, Murli Singhania bad u Nilesh Singhania.
Haduh ba thoh ia kane ka khubor haka por 8 baje mynmiet, ki pulit pynlip ding kila lah ban pynlip iaka ding ha ka bynta ba shakhmat jong katei ka building hynrei ki dang iakhun pat ban pynlip ia ka ding kaba dang klang ha ki bynta ba shadien jong katei ka building haduh mynta.
Ka Secretary jong ka tnad Revenue and Disaster Management bad ka Executive Director jongka State Disaster Management Authority, ka Kong Matsiewdor War Nongbri, ka DC kong RM Kurbah, ki heh ophisar bad ki heh pulit kila poi sha kane ka jaka ban peit ia ka jinglong jingman bad kine kila don beit ha katei ka jaka haduh ba thoh ia kane ka khubor.
Ki pulit haduh mynta kim pat lah ban tip ia ka daw jong ka jingpluh hynrei ki dang pynleit jingmut ha kaban tem ia katei ka ding bad da ki phew tylli ki kali pynlip ding kila poi sha Thana Road ban tem ia katei ka ding.
