Shillong, Aug 14: Ka jingak drama ba kyrpang halor ka jingim u Netaji Subhas Chandra Bose bala ai kyrteng ka Rashtraputra, la pyni ha rynsan ka DGAR Auditorium, Laitkor, Shillong ha ka sngi Palei.
Ia kane ka jingak drama la pynlong da ka Rashtriya Jagriti Sansthan ryngkat ka jingiatreilang bad ka PA Sangma Foundation.
Ki tyngshop ki puron jong ka Netaji Institute of Skill Development kila shim ia ka bynta ha kaban ak ban wanrah sha ka jingpynim ia ka jongiakhun bad ia ka nongrim jong u nongiakhun pynioh jinglaitluid une u riewkhraw ka ri India. Kane ka institute, nalor ka jingai jinghikai ne vocational training, ka pynleit jingmut ruh ha kaban tei ia ka jinglong jingman bad ka mynsiem ieid ri hapdeng ki samla lyngba kane ka jingpyni drama.
U Myntri Rangbah ka jylla u Conrad K Sangma, uba leit iashimbynta ha kane ka prokram kum u Kongsan, ula iaroh ia ka sap ka phong jong ki tynshop ki puron kiba la iashimbynta.
U James P K Sangma, uba mihkhmat ia ka P A Sangma Foundation, ula ong ba ka Foundation ka kyrshan ia kum kine ki sienjam namar ba ki pynkhlain ia ka jingieid ri bad ka jingiatylli ym tang ban shu kynmaw ia ki riewshlur ka ri hynrei ban sngewthuh ia ka jingkordor, ka hok, ka jingbym noh shilliang bad ka India kaba laitluid ia baroh.
Kane ka drama ka long kum ka jingai burom ia u Netaji kaba mut ruh ban pynshlur ia ki khynnah samla, ban kyntiew ia ka mynsiem ieid ri.
Ha kane ka sngi u Myntri Rangbah ula pynkup burom ia ki Tyngshop ki puron kiba la iashimbynta ha katei ka drama kaba kit jingmut bha.
