Shillong, Jylliew 07 : Ka Harijan Panchayat Committee (HPC) kala pdiang ia ka blueprint/plan bala pynkhreh da ka Sorkar Jylla halor ka jingtyrwa ban pynkynriah noh ia ki 342 tylli ki Longiing na Them Metor, Them Iew Mawlong sha ka jaka jong ka Shillong Municipal Board (SMB) bala don lypa.
Ha ka hukum bala pynmih hadien ba shong bishar ia ka kam, ka Division Bench ka Iingkashari Meghalaya High Court bala khlieh da u Chief Justice Sanjib Banerjee bad Justice W Diengdoh kala ong “U Advocate General ula pyntip baka Harijan Panchayat Committee kala mynjur ia ka blueprint bala pynkhreh da ka Sorkar Jylla hynrei kala buh ia ki jingai jingmut ban pynkylla ia katto katne ki bynta jong ka”.
“Namar ba ka Jylla ka dang khmih ia kine ki jingai jingmut ban pynkylla, ai ba kane ka kam kan wan biang sha ka jingbishar hadien lai taiew. La kyrmen ba ki kynhun mamla kin pynbeit noh ia kane ka kam ba sahteng bad pynkut shisyndon ia kine ki kam” ong ka Iingkashari.
Ka Iingkashari kala buh ban shong bishar biang ia kane ka mukotduma ha ka 3 tarik u Naitung, 2023.
Ka Sorkar Jylla kala wanrah ia ka blueprint hadien ka jingkyntait ia ka jingtyrwa ba 25 tarik Iaiong, 2022 jong ka Harijan Panchayat Committee kaba pan 200 square meter ka jaka sha kawei pa kawei ka Longiing ki 342 tylli ki Iing hapoh ka European Ward nalor ban pynlut ruh ia ka bai shna iing.
Ha ka 31 tarik Nailar, 2022, ka Sorkar kala pynbna ia ka rai ban shna ia ki iing bun mala (flat) ha ka jaka bah eh 2.5 acre, kaba dei jong ka Shillong Municipal Board (SMB) na ka bynta ban pynkynriah ia kine ki 342 tylli ki Longiing na Them Metor.
“Mynta ngin sa pynpra noh ia ki jingtei kiba rim bad ngin sa shna ia ki Iing mala ba 5 lane 7 mala kat kum ka Meghalaya Development Urban Authority (MUDA) byelaws,”pyntip u Symbud Myntri Rangbah ka Jylla Bah Prestone Tynsong ha katei ka por.
Lah ban kdew hangne ba ka Harijan Panchayat Committee (HPC) kala kyntait kham hashuwa ia ka blueprint jong ka Sorkar Jylla.
Ha ka jubab ba 6 sla bala phah sha u Deputy Secretary ka Sorkar Jylla bad kiwei kiwei ki Tnad Sorkar, ka HPC kala kynnoh ba ka jingtyrwa jong ka Sorkar ka dei ka bym pat biang pura, ka bym iahap, ka bym long bad kaba beiriti.
 byelaws,”pyntip u Symbud Myntri Rangbah ka Jylla Bah Prestone Tynsong ha katei ka por.){kind=link}