Goalpara, Risaw 26 : Ki bor pyniaid district ha Goalpara, Assam kila khangdam noh ia ka Miya museum kaba dang shu dep plie hynnin ka sngi ba Ar.
Kane ka jingkhangdam ia kane ka Miya museum kaba dang shu dep plie shen ha Goalpara district ka Assam kala wan long shi sngi hadien ba u myntri rangbah (CM) ka jylla u Himanta Biswa Sarma ula buh ka jingkylli ha kaba iadei bad ka jingbei tyngka na ka bynta kane ka museum.
Ia ka jingthoh halor kane ka jingkhangdam la tah ruh hapoh ka jingkhang jong kane ka museum ha Goalpara district ka Assam.
Na ka liang u CM ka Assam ula ong ba na ka liang ka tnat pulit ka jylla kan pynlong ka jingtohkit halor ka tyllong jong ka jingbei tyngka na ka bynta ka jingtei ia kane ka Miya museum ha ka jylla.
Kane ka ka musuem la plie dang shen hapoh Lakhipur kaba ha Dapkarvita hapoh Goalpara district kaAssam.U CM ka Assam ula ong ba ka jingtohkit halor ki kam bei tyngka na ka bynta ka jingtei ia kane ka museum yn sa pynlong shen ha kine ki khyndiat sngi ki ban wan.
Nalor kata ula ong shuh shuh ba kito kiba don bynta ha kaba pynieng ia kane ka Miya museum ha Goalpara district kin ngat ha ka jingshah tohkit ha ki bor pulit.
Na ka liang ki nong pyniaid jong ka Miya museum kin shah tohkit ruh ha kaba iadei bad ki jingbuh jingsat ia kiba la buh hapoh kane ka museum kiba ha ka jingshisha ki dei ki bynta kiba katkum ka kolshor jong ki jaidbynriew Assamese, ong u CM Sarma.
Nalor kata u CM ka Assam ula ong shuh shuh ba lada ki bor pyniaid jong kane ka museum ki pulom ban ai ia ka jubab kaban pynhun kumta ruh yn shim ka jingpynshitom pyrshah ia ki.
U Himanta ula pynpaw ruh ba kane ka lah ruh ban dei ka jingpyrshang ban knieh jubor ia ka kolshor da kaba tei ia ka Miya museum.
“Baroh ki tiar ki tar kiba la buh hapoh katei ka museum ki dei kiba la pyndonkam da ki nongshong shnong kiba dei ki trai shnong Assamese.Ki tiar khwai ba la ju pyndonkam ha kaba tong dohkha baroh ki dei jong ki nongshong shnong trai shnong Assamese,” ong u CM ka Assam.
Shuh shuh u Sarma ula ong ba dei tang ka lungi ne ka jain pien jong ki shynrang kaba la buh ha katei ka musuem kaba dei jong ki nongshong shnong na ka kynhun bynriew Miya.
“Kaei kaba thymmai kaba don ha kane ka jaka?Ki tiar ki tar ki dei kiba ju pyndonkam da ki trai shnong Assamese lait noh ka Lungi. Ki dei ban pynshisha sha ka sorkar bad ia kine ki tiar la pyndonkam tang da ki kynhun bynriew Miya bad ym da kiwei pat, lem kumta yn rejistar case pyrshah ia ki,” ong shuh shuh u CM ka Assam.
Shuh shuh ula ong ba ki riew shemphang ka jylla ki dei ban pyrkhat halor kane.Kila khot ia nga u nong wanrah ia ka jingiapher kynhun bynriew haba Nga pynpaw ia ka sur jong nga ha kaba iadei bad ka poetry jong ki jaidbynriew Miya.Mynta nalor ka poetry jong ki Miya, kila din ki skul bad wat ka museum jong ki Miya ha kane ka jylla.
