Nongstoiñ, Risaw 20 : Ka Federation of Khasi Jaintia & Garo People (FKJGP)-West Khasi Hills, hynne ka sngi Thohdieng, ka la khang tala ia ka kor tylliat maw jong ka kompani kaba shna ia ka surok Nongstoin-Wahkaji namar ka jingshem ba kane ka kompani kala wanrah ia ki nongbylla bar Jylla kiba pynkhein ia ki ain ki kanun ka Jylla bad District Council.
Ka FKJGP kala shim ia kane ka sienjam hadien ka jingleit khynra ia ka Trading Licence bad Labour Licence jong ki nongtrei bylla bar jylla jong kane ka kompani kiba iashong iasah ha ka shnong Kynroh.
Kane ka Seng hapoh ka jingialam u Vice President Carry Oscar Kharmuti, kala iakynduh ruh ia ki bor pyniaid jong kane ka kompani ban pan jingkhein ia ka jingdon jong ki nongbylla bar jylla bad ia ki jingpynshisha halor ki kot ki sla jong kine ki briew kiba wan na shabar ka Jylla.
Namar ka jingshem ba bun ki nongtrei bylla ki dei ki bym don ia ki Labour Licence lait noh tang katto katne ngut, kane ka Seng kala shim ia ka sienjam ban khang tala shuwa ia ka kor tylliat maw haba bthah ia ki bor pyniaid ka kompani ba ki dei ban pynbiang shuwa ia ki kot ki sla jong ki nongtrei shuwa ban loit ia ka tala.
Haba kren bad ki lad pathai khubor, u bah Corry Oscar ula ong ba kane ka jingleit khynra Licence kam dei ba ka seng ka kwah pynthut ne ban khang ia ka jingshna surok hynrei ka dei tang halor ka nongrim ba ki bar jylla haba ki wan rung shapoh Jylla, la ki dei ki nongkhaii ne nongbylla, kim dei ban shu wan rung laitlan kum ki masi ki blang hynrei ki dei ban wan da ka lynti jong ka ain bala buh da ka Sorkar bad ki District Council.
Une u Nongialam Sengbhalang ula kyntu ia ka Sorkar Jylla ba kan bthah ia ka Tnad Infiltration ba kan pyrrkhing bha ia ka jingwan rung jong ki bar jylla khnang ban nym ailad satia ia kiba thmu ban iaid lait ia ki ain ki kanun kiba don hapoh ka Jylla, kiba teh kyndon ia ka jingtrei jingktah bad khaii pateng.
Ula kyntu ruh ba ka Sorkar ka dei ban pyrrkhing bha ba ki kompani kiba wan trei ia ki surok ne kino kino ki kam ha Jylla, kim dei ban shu wan ialam ia ki nongbylla nabar ka Jylla hynrei ban ailad shuwa ia ki trai jylla lait noh tang ki kam kiba kim lah ban trei.
