Shillong, Lber 14 : Ki bor district ka West Garo Hills kila khang pyrshah ia ki nongtrei sorkar ba kin pynmih ia kino kino ki jingthoh ne pynphriang ia ki khubor pynshit, ki video ne kynthoh eiei halor ki jingkulmar, haba maham ba kiba pynkhein ki ngat ha ki jingpynsajia kat kum ki kyndon ain.
Ka hukum bala pynmih da u district magistrate Vibhor Aggarwal ha ka sngi Saitjain, ka ong ba la khang pyrshah jur ia ki nongtrei Sorkar ba kin pynmih ia kino kino ki jingthoh, pynphriang ia ki khubor, ki video, ki dur lane kino kino ki jingthoh kiba lah ban aiding ne pynshit iano iano.
Lah bthah ia ki ba kim dei ban kynthoh eiei halor ki jingkulmar kiba jia ha kiwei pat ki district ne ki Jylla ha ka rukom kaba lah ban pynmih ia ka jingbitar ki paidbah ne jingialeh pyrshah hapdeng ki kynhun ka imlang sahlang.
Kane ka hukum ka treikam ia baroh ki ophis ka Sorkar ha ka district bad lah bthah ia ki khliehduh jong kine ki ophis ba kin pynthikna ba ki nongtrei jong ki, ki bud pyrrkhing bha ia kane ka hukum.
Ki bor district kila maham ba kano kano ka jingpynkhein ia ka hukum kan khring ia ka jingpynshitom kat kum ki kyndon ain nalor ka jingshah pynshitom hapoh ka Meghalaya Civil Services (Discipline & Appeal) Rules, 2019.
