Shillong, Nailur 27 : Ki kynhun Sengbhalang bapher bapher ka Jylla, ha ka step sngi u Blei, kila leit khang khyrdep ia ki Bank ha baroh kawei ka Jylla ban pyrshah ia ka jingtreikam ha kane ka sngi ba Kyntang ki Khristan, da kaba ong ba ka Sngi U Blei ka dei kaba kongsan ia ki riewngeit Khristan ba kin leit Jingiaseng bad ruh ka dei ka sngi kut taiew ban shong jahthait ki nongtrei.
Ka hukum ba ki Bank ki dei ban treikam ha ka Sngi U Blei, kala wan na ka Sorkar Pdeng hadien ba ki nongtrei bank kila pynbna ban pynlong ia ka jingsangeh treikam ba lai sngi ha baroh kawei ka Ri naduh ka 28 tarik Nailur haduh ka 30 tarik Nailur.
Ka Sorkar kala pynpaw ba ka daw ba btah ia ki Bank ba kin treikam ha ka sngi U Blei ka long ban pynthikna ia ka jing shakri ba khlem don jingthut hashuwa jong ka jingiakhih.
Hynrei ki Sengbhalang ha Meghalaya, kila pyrshah ia kane ka sienjam da kaba ong ba kane ka jingbthah kam shym la pyr khat lang ia ka jinglong kongsan ka Sngi U Blei ha Jylla kaba don bun ki paid Khristan.
Ha Ri-lum Khasi-Jaintia, ki sengbhalang ba kynthup ia ka Khasi Students’ Union (KSU), Federation of Khasi Jaintia & Garo People (FKJGP), Jaintia Students’ Union (JSU) bad kiwei kiwei, kila don ha kylleng ki shnat treikam jong ki Bank ha kylleng ki jaka, bad kila khang ban treikam ha kane ka sngi.
Ha ri-Lum Garo, ki sengbhalang ba kynthup ia ka AAYS, ADE, AYWO, FAF, FKJGP bad GSU, nalor kiwei kiwei, kila iamih ryntih ban iashimbynta ha kane ka jingleit khang ia ka jingtreikam ki bank ha kylleng ki shnat treikam.
Kine ki kynhun Sengbhalang kila ong ba ka Sngi U Blei ka long kaba kyrpang bha ia ki paid Khasi Jaintia bad Garo, khamtam ia ki riewngeit Khristan, namar ka dei ka sngi leit Iingmane, pynlong jingduwai bad ter ter.
Kila pynpaw ruh ia ka jingsngewkhia halor ki nongtrei jong ki Bank, da kaba ong ba ia ka sngi U Blei dei ban khein kum ka sngi shong jahthait jong ka kut taiew, ka ban ailad ia ki ban pynlut por bad la ki bahaiing hasem, ban sangeh leh ia ki kam ba ju leh manla ka sngi bad ban leit Iingmane.
Ki Sengbhalang kila kyntu ia ki nongtrei jong ki Bank ba kin pyrkhat bha ia ka jingtreikam ha ka Sngi U Blei bad ban pyrkhat ruh ia ka jinglong kongsan kane ka sngi ia ka imlang sahlang bad ki nongtrei jong ki Bank.
