Tura, Naitung 25: U District Magistrate jongka West Garo Hills, u Jagdish Chelani, ula pynmih ia ka hukum ha kaba la bthah ia ki jaka pule kiba hap ha Tura Municipal Area ban khang khyrdep mynta ka sngi Baar.
Ha kane ka hukum la bthah ba ki jaka pule kin bteng biang ban plie ha ka sngi Balang da kaba bud ryntih ia ki kyndon jong ka 144 CrPC kaba la pynmih ha ka sngi Nyngkong.
Ka jingphah khang ia ki jaka pule ha Tura kadei shi bynta ban shim ia ki lad jingiada ban pynneh iaka shongsuk shongsain ha ka thain. U District Magistrate ula kyntu ia ki nongshong shnong ban ai iaka jingiatreilang bad ban bud ia ki jingbthah na ka bynta ka jingshngain jong baroh lang.
Da kaba bud ryntih ia katei ka hukum, ka Don Bosco College kala pynmih ia ka notis ba ka college kan khang ha ka 25 tarik u Naitung (Sngi Baar). Ia kane ka rai la shim ban pynthikna ba ka jingshngain bad ia ka bha ka miat jong baroh ki samla pule bad ki nongtrei hadien ba kala mih ka jinghuri hura ha ka sngi Nyngkong.
Ha katei ka notis la pynpaw ruh ba ka College Assembly, kaba dei ban long mynta ka Sngi Baar la pynkynriah noh shwa ia mynta bad ia ka tarik yn sa pyntip kham hadien.
Ther Maw u paidbhur ia ka CMO office ha Tura
Ia ka hukum pynjari iakam kyndon 144 CrPC la pynmih hadien ba kala don ka jingther maw iaka CM Secretariat, kaba la tip ruh kum ka CMO Tura, katba u Myntri Rangbah ka jylla u Conrad K Sangma u dang lum ia ka jingialang ha ka miet sngi Nyngkong bad ki kynhun sengbhalang bad kiwei kiwei ki kynhun, hynrei kala don ka jingshah ther maw ha ki paidbhur ha kaba 5 ngut ki pulit kila mynsaw.
Namar katei ka jingjia, ki bor pyniaid district kila pynjari ia ka kyndon 144 CrPC.
Bun ngut ki paidbah, ia kaba la kynnoh ba kidei na ki kynhun khwan myntoi kila ialum habar jong ka CMO office ha Tura bad sdang ia ka jingther maw haduh ba ki pulit kila hap siat da ki “Tear Gas” ne tyndong lyer ban pynpra ia utei u paidbhur.
U Myntri Rangbah ula leit sha Tura da ka jingthmu ban iakren bad shimkhia ia ka jingdawa ki kynhun jong ka imlang sahlang hynrei kala mih noh ka huri hura hapdeng ki paidbhur bad ki pulit.
Ia ki pulit kiba la mynsaw la pynkit noh sha hospital na ka bynta ban ioh ia ka jingsumar.
