Nongpoh, Nailur 04: Ka Hynniewtrep Integrated Territorial Organization (HITO)-Ri Bhoi District ha ryngkat ka Bhoirymbong Area, ki la leit ban khang tala ia shibun tylli ki dukan kiba pyniaid da ki bar jylla ba khlem kot khlem sla ha shilynter ka surok Shillong By-Pass bad ka Bhoirymbong.
Kane ka jingkhang khyrdep kala mih hadien ka jingkhynra Trading Licence jong kane ka Seng hapoh ka jingialam jong u Vice President ka HITO-Ri-Bhoi samla Alvis Kyrsian.
Hynrei katba kane ka jingkhynra ka dang iaid shakhmat, ki don katto katne ngut ki Khasi kiba la wan ban kam trai ia kine ki dukan bala suba pyniaid da ki bar Jylla.
Haba iakren bad ki nongthoh khubor, u Alvis Kyrsian ula pyntip ba ka Seng kala ioh jingtip kiba paka halor ka jingdon jong kine ki dukan bar jylla ba khlem kot khlem sla khamtam ka Trading Licence na ka KHADC. U ong ba dei halor kane, ka seng kala pynlong ia ka jingkhynra bad kala khang noh ia bun tylli ki dukan.
Hynrei ula pynpaw pat ia ka jingbynniaw ba ki don katto katne ngut ki Khasi kiba la pyrshang ban iada ia kine ki bar jylla da kaba kam trai ia kine ki dukan.
U pyntip ba ia kane ka jingkhynra la pynlong ruh hadien ba ka seng ka iohi ia ka jingkhein sting jong ka KHADC ban khynra Trading Licence wat hadien ka jingujor jong ka Seng. U kynnoh ba ka Tnad Enforcement jong ka KHADC kala khein sting ia ka jingujor, kaba la pynbor ia ka seng kan shim halade ia ka bynta ban leh ia kaba donkam.
U President ka HITO-Bhoirymbong Area samla Samuel Hinge ula iathuh ba ka jingdon ki bar jylla ba wan leh ia ki kam khaii ha Bhoirymbong kala nang kha roi ha kine ki khyndiat sngi, kaba long ka jingma ia ka lawei jong ki samla ha ka iohkam iohjam bad ruh ia ka shongsuk shongshngain lada ym lah ban tehlakam.
