Shillong, Nailur 04 : Haduh 10 ngut ki dkhot ka Hynniewtrep Integrated Territorial Organization (HITO) kila shah kem namar ka jingkawang maw sha ki Pulit bad ki magistrate, kiba khang lynti ia ki ban iatur sha Secretariat hynne ka sngi Nyngkong.
Kane kala mih hadien ba u President ka HITO Donbok Dkhar, ula shah khot hajur ha u Investigation Officer (IO) ha Sadar Police Station ba iadei bad ka case bala register pyrshah ia u ha u bnai Naitung.
Ki Pulit kila register case ia une u Nongialam hapoh ka kyndon 171 bad 34 IPC pule lang bad ka kyndon 105 jong ka MP Act namar ka jingpynphong uniform rong iong ia ki dkhot ka HITO. Kine ki uniform iong ki iasyriem thik bad kiba ju phong da ki pulit SOT.
Ki Pulit kila hap ban pyndonkam ia ki lathi bad siat ia ki tyndong lyer pynsat khmat hadien bad ki dkhot ka HITO kila ther maw sha ki Pulit ha ka jingpyrshang ban leit tur jubor sha Secretariat.
Ha kane ka jingjia, u Superintendent of Police (DySP) ula mynsaw na ka jingshah kawang maw.
Haba iakren bad ki nongthoh khubor, u Superintendent of Police ka East Khasi Hills Bah Sylvester Nongtnger ula ong ba ha ka jingshisha, u IO ula khot tang ia u President ka HITO ban wan sha Sadar Police Station hynrei ki dkhot ka HITO kila iawan paidbah.
“Hooid, ngi la shah ia 5-6 ngut ba kin iarung shapoh ka Police Station katba kiwei ki hap ap shabar. Hadien ba ngi la shim jingthoh (statement) la shah ia u bad kiwei ba kin mih noh na Police Station” ong u Bah Nongtnger.
“Hynrei ynda kila mih nangtei, ngi ioh jingtip ba ki kwah ban wan sha Secretariat bad ban bret ia baroh ki placard ba kila rahlang bad ki. Haba tip ia kane, la khang lynti ia ki ha lad DC Ophis da ki Magistrate bad ki Pulit” ula ong.
Hynrei na kane ka jingkhang lynti, kala mih ka jingiakawang maw sha ki Pulit bad Magistrate bad ktah kti ruh ia ki Pulit Kynthei nalor kawang maw ia u DySP uba la mynsaw malu mala. Namar kane ka jingjia, ki Pulit kila hap ban kawut da ki lathi bad siat tyndong lyer pynsat khmat.
Haba kylli, ula iathuh “Ka case hi ka long ba ki phong ia ki uniform rong iong khlem da ioh jingbit. Namar kata la register case bad la khot hajir sha thanad ban shim statement”.
