Yn thoh sha ka AAI ban nym ai jaka hiar ia ka liengsuin
Shillong, Nailur 27 : Ka Sorkar Jylla kala rai ban khang ia ka jingwan hiar ka liengsuin ba wan kit kyrpang (Chartered Flight) ia ka kynhun ki shitniam hindu -ka Jyotish Peethadheeshwar Shankaracharya Avimukteshwarandah, ha Shillong Airport, Umroi.
Ka Sorkar kala shim ia kane ka rai ha ka jingialang jong ka High Level Committee (HLC) kaba long hynne ka janmiet hadien ba la pynthikna ia ka jingthmu jong kane ka Seng Hindu ban wan lashai ka sngi da ka liengsuin ha Shillong Airport.
Ia kane ka High Level Committee la pyniaid da u Chief Secretary Bah DP Wahlang, kaba la iashimbynta da ka Director General of Police (DGP), ki Deputy Commissioner ka East Khasi Hills bad Ri-Bhoi District lem bad ki heh Ophisar ka Tnad Home (Police).
Haba iakren bad ki lad pathai khubor, u Chief Secretary ula pyntip ba ka Sorkar kan sa thoh sha ka Airport Authority of India (AAI) ba kan kyntait ha ka ban ai ia ka jaka hiar jong kane ka liengsuin kine ki briew ha Shillong Airport.
Kat kum ka jingong jong u, kane ka kynhun ba thmu pynlong rally, ka khlem pat pan jingbit satia ban pynlong rally ne kano kano ka jingiakhih haduh mynta.
U pyntip ba ka Ophis ka Deputy Commissioner ka East Khasi Hills kala dep pynjari ia ka kyndon 163 BNSS (144 CrPC mynshuwa) bad kumjuh ruh ki bor District ka Ri-Bhoi kin sa iaid ha kane ka juk ka lynti, ban pynthikna ba kan nym mih kano kano ka huri hura ba pynthut ia ka suk ka sain ha Jylla khamtam ha East Khasi Hills bad Ri-Bhoi.
U Chief Secretary u pyntip ruh ba ka Sorkar kala iakren bad ka Central Puja Committee, kaba la pynpaw ba kam sngewtynnad ne kyrshan satia ia kane ka rally bad ka jingthmu jong ka.
 ia ka kynhun ki shitniam hindu -ka Jyotish Peethadheeshwar Shankaracharya Avimukteshwarandah, ha Shillong Airport, Umroi.){kind=link}