Kham khlain ka jingtreikam ki District Council naduh ba synshar ka Sorkar MDA ha Jylla : DyCM

Shillong, K’lyngkot 18 : U Symbud Myntri Rangbah ka Jylla Bah Prestone Tynsong ha ka sngi Saitjain ula ong ba ka jingtreikam jong ki Autonomous District Council (ADC) kala kham khlain bad kham janai hadien ka jingwan jong ka Sorkar MDA ba ialam da ka NPP ha ka bor naduh u snem 2018.

Haba kren ha ka Dorbar Iktiar Paidbah bala pynlong da ka Khasi Hills Autonomous District Council (KHADC) ha Polo, u Bah Prestone ula ong ba ka dei ka sien ba nyngkong ba un iohi ia kum kane ka jingialang kaba heh bala pynlong ban aiti ia ki surnot sha ki bor synshar shnong hapoh u pud u sam ka KHADC.

Ula iaroh ia u Lat ka Jylla CH Vijayashankar namar ka jingai jingmynjur ia ki Bill bapher bapher kiba sahteng jong ka KHADC.

“U Lat u dang shu wan dang khyndiat bnai sha Meghalaya hynrei ula ai ia ki jingmynjur ia bun tylli ki Bill kiba la kylla long ki Ain mynta” ula ong haba bynrap ba ka jingtreikam jong ki ADC kala kham khlain bad janai bha ha ka Jylla ha kine ki 7 snem ba synshar ka Sorkar MDA.

Kat kum ka jingong jong u, kane ka Sorkar ba mynta kala wanrah ia ka rukom treikam ban weng ia ki jingeh bapher bapher bala iakynduh da ki District Council kynthup ki Bill ba sahteng.

“Shwa u snem 2018, ki don ki Bill kiba la mynjur da ki ADC kiba la jah noh ha lynti ban poi sha Secretariat bad ki don ki khep ba ki MDC ki klet wat ia ka tarik kaba ki la ai jingmynjur ia kita ki Bill hynrei hadien u snem 2018, ki Bill kiba la mynjur da ki ADC ki poi kloi sha ka Secretariat namar na ka por sha ka por ka tnat DCA jong ka Sorkar Jylla ka la khot iakren bunsien bad baroh ki ADC halor ki mat kiba ïadei bad ki Bill” u la ong.

Haba pynkynmaw ia ka jingjia ha u snem 2014 ha kaba ka High Court kam shym la ithuh ia ka bor jong ki Rangbah Shnong, u Bah Prestone u la ong “Ka la don ka jingialang paidbah ha kane ka juh ka jaka ban iakren halor katei kajuh ka mat, naka liang ka Sorkar Jylla bad KHADC ngi la kyndit bynriew bad kane ka la ialam ngi ban shna bad thaw ia ki katto katne ki ain. Kum kane ka jingjia ka jia ban pynlong ïa ngi ban ïoh jinghikai khamtam ïa ki ADC bad ïa ka Sorkar Jylla ba kaei kaei kaba ngi leh, ngi dei ban leh katkum ka aiñ”.

U Symbud Myntri Rangbah u la ong ba ka Land Bill kaba long mynta ka Land Act jong ka KHADC ka pynskhem ia ka jinglong trai khyndew ha ka jylla khamtam ha ka rilum Khasi.

“Ngi dei ban kynmaw ba ka rai jong ka Supreme Court ha u snem 2019 shuwa ba ka KHADC ka wanrah iaka Land Act, ka la kdew ba ha Meghalaya namar ba ki jaka ki dei ki jong ki briew shimet, ki Hima, ki Raid, ki Kur, ka Supreme Court ka la pynmih ïa ka rai ba ym dei tang ka khyndew ka shyiap , wat ki marpoh khyndew ruh ki dei jong ki trai jaka” u la ong.

Naka liang u CEM ka KHADC u Bah Pyniaid Sing Syiem ha ka jingkren ai khublei ia u Lat ka Jylla uba la ai ka jingmynjur iaki ain ba kongsan, khamtam ia ka Administration of Elaka Amendment Act 2023, ka KHAD Khasi Social Custom of Lineage Act Amendment Act 2023 bad ka Regulation and Administration of Land Act bad kiwei kiwei de.

“Ka jingwan shim bynta jong phi ha kane ka Dorbar kan sahnam ha kaba ka pateng ban wan kan tip ba ha kane ka sngi ngi, don ka sakhi bala pynkupbor bad ithuh daka ain ia ki tnat treikam hapoh ki shnong ki thaw naduh ka Dorbar Shnong, ka Seng Kynthei/Seng Longkmie/Seng Samla Shnong” la ong u Bah Pyniaid.

U Bah Pyniaid u la pyntip ba ki don haduh 54 tylli ki Elaka kiba hap hapoh ka jingpeit jong ka KHADC ha kaba ki don jan 5000 tylli ki shnong hapoh kine ki Elaka bad hapoh kine ki shnong ki don ki Seng Kynthei/Seng Longkmie/Seng Samla Shnong bad hapoh ka thain Khasi-Jaintia Hills baroh kawei ki don ki Kurs.

“Katkum kawei ka jingwad bniah ba la leh da u Bah Raphael Warjri, ki don haduh 5000 tylli ki Kur” la ong u Bah Pyniaid.

U CEM u la pyntip ba baroh ki ain jong ka KHADC la dep ban pynkylla haka ktien Khasi bad ai kine ki ain yn sa phah shaki Hima, khnang ba ki Hima ki lah ban phah sha baroh ki shnong khnang ba ki paidbah kin ioh pule bad tip kham bniah.