Shillong, Rymphang 13: U Symbud Myntri Rangbah ka jylla u Bah Prestone Tynsong ula ong, ba ka Sorkar Jylla ka iengskhem ha ka nongrim ba donkam ban ker sainar ha khappud bad ka ri Bangladesh hynrei ka jingker kadei ban long hajan Zero Line.
Ula pyntip ba ka sorkar jylla kala dep phah da ka jingthoh sha ka Ministry of Home Affairs (MHA) ka Sorkar India ba ki pdiang ia ka jingker sainar hynrei kadei ban long marjan bad u Zero line hapdeng ka India bad Bangladesh.
“Ka nongrim ka jong ngi ka long kaba shai kdar ba ngi kwah ban ker sainar ha khappud hynrei kala mih pat ka jingeh ha ka rukom pynbeit ia ka jingker sainar namar kala poi shaduh ki jaka jong ki trai khyndew, ki jaka jong ka Kur, ne ki jaka jongka Shnong. Kane kala pynmih iaka jingpyrshah na ki bor pyniaid shnong bad wat ki trai jaka bad ki kynhun sengbhalang” ula ong.
U DyCM ula iathuh ba ka sorkar bad ki shnong ha khappud ki pdiang sngewbha ia ka jingker sainar ha khappud hynrei ka jingsngewkhia jong ki trai khyndew bad ki bor pyniaid shnong ka long ba da lei lei ruh kin ym ailad ban ker sainar shapdeng jong ka shnong ne jaka rep jong ki nongrep.
Haba kylli, ula ong ba ka Sorkar Jylla haduh mynta kam pat ioh pdiang satia ia kano kano ka jubab na ka MHA.
Ha kaba iadei bad ka jingwan rung tuh ki nong Bangladesh shapoh Meghalaya bad leh ia ki kam pyntriem ba bun jait bun rukom, u Bah Prestone ula ong ba ula bthah ia u IG ka BSF ba ki dei ban long kiba peitngor bha bad ba kin pahara bha khnang ba kum kitei ki jingjia kiba sngewsih kim dei satia ban jia.
“Ngim tip lano kitei ki briew (Bangladeshi) ki thmu ban wan rung shapoh u pud jong ngi hynrei ngi la bthah ia u IG ka BSF ba kidei ban long kiba trei shitom bad kiba peitngor bha khnang ba yn lah ban tehlakam ia kino kino ki jingjia kiba sngewsih ha kano kano ka dur” la ong u Symbud Myntri Rangbah.
