Nongpoh, Rymphang 10 : Bun ngut ki Khynnah skul jong ka Don Bosco , Harlibangan, Byrnihat, hynne ka sngi thohdieng, kila shu kem pang kynsan kynsan bad prie khlem daw katba ki dang kilan met ban iashimbynta ha ki jingialehkai ki ban sa long shen.
La suba jur ba kane ka jingkem pang ki khynnah ka lah ban dei na ka jingiw ka jingsma bad ka jingtdem bala pynmih naka karkhana sain nar kaba don marsyndah bad kane ka skul.
Ki Nongthoh khubor haba pyrshang ban wad bniah halor kane ka jingjia, kila iakynduh ia u Principal kane ka Skul Fr Kmenlang Nongrum, uba la batai ba bunsien ka skul kala ju ujor halor ka jingpynmih tdem jong kane ka karkhana kaba la tip kum ka ka Meghalaya Cast and Alloy private limited, kaba la ktah bha ia ka koit ka khiah ki khynnah.
Ka seng HITO Ri-Bhoi District, haba ioh jingtip ia kane ka jingioh pang ki Khynnah Skul, kala hiar wut wut ban leit jngoh bad iakynduh ia ki Nongpyniaid skul bad ki Nongpyniaid Shnong kiba la pyntip ba la bunsien kila ju ujor bad pynlong ruh ia ki rally pyrshah ia ka jingpynmih tdem jong kane ka karkhana hynrei ym shym la don ba pynsngap satia.
Halor kane ka jingshem, ka HITO kala ujor daka ejahar ha Byrnihat Police Station bad kumruh ruh la ujor sha u Deputy Commissioner ka Ri-Bhoi ban phah tohkit bad ban phah ia ki doktor na ka bynta ban leh medical checkup ia baroh ki khynnah kane ka skul.
Ha kajuh ka por, ka HITO kala dawa ia ka State Pollution Control Board ban pynduh noh ia ka licence jong kane ka karkhana haba maham ba lada kam leh eiei, ka seng kan sa thom hi da ka bor ha kano kano ka por.
U Fr Kmenlang u ong ba kane ka jingpynmih tdem kala ktah wat ia ki Nongshongshnong bad kumjuh ruh ia ka wah kaba don marjam namar ka jingpyntuid ia ki jakhlia na kine ki karkhana.
U Rangbah Shnong ka Harlibagan Bah Sisten Nongrum bad u Secretary Bah Bosci Klein, kila ong ba ka jingdon jong kane ka karkhana kala ktah haduh katta katta ia ka koit ka khiah ki khynnah haba buh jingkylli ruh ba kumno kane ka karkhana kala ioh jingbit ban buh ia kane ka karkhana hajan ka skul.
Kila ong ba ka NOC jong kane ka karkhana kala kut ha u Naiwieng 2022 bad ka Shnong kala dep phah da ka jingthoh sha u Trai ka karkhana ha u Nohprah 2022 ba un pynbiang ia ki kot ki sla bad ba u dei ban pynduna ia ka jingpynmih tdem n aka karkhana hynrei la kynnoh ba haduh mynta kane ka kompani kam pat wan mih satia.
Ki Nongpyniaid jong katei ka karkhana kila pynshai ia ki jingkynnoh baroh bad ong ba ka tdem kaba mih kam dei satia tang na karkhana jong ki hynrei ka dei jaba wan na kylleng ki karkhana kiba don ha ka thain. Kila kyntait ruh ba ki pyntuid ia ka jakhlia sha wah.
