Dimapur, Rymphang 11: Ha kawei na ki jingkylla ha ka sain hima sima, u kyrtong ka BJP ha Nagaland u Kazheto Kinimi u la shah jied biang khlem da don kino kino ki nong ia aireng ha kane ka sngi Thohdieng ba la lah napoh Akuluto assembly constituency, kata hadien ba tang uwei u nong ia aireng na ka seng Congress u Khekashe Sumi u la weng noh ia lade kum u kyrtong na ka bynta kane ka ilekshon assembly.
Na ka liang ki nongkyrshan jong u Kinimi ki la sdang ia ka jinglehkmen khyndiat por hadien ba une u kyrtong ka BJP u la shah jied biang kum u MLA khlem da don kino kino ki ban ia aireng pyrshah ia u.
U Kazheto Kinimi u la shah jied sha ka iingdorbar assembly ka jylla ha ka sien kaba nyngkong ha ka ilekshon kaba la long ha u snem 2018 na katei ka juh ka assembly constituency.
Hashwa ka jingpynlong ia kane ka ilekshon assembly kane ka jinglong jingman ka la nang pynioh mynsiem shuh shuh na ka bynta kane ka saffron party.
“Ka long ka burom kaba khraw ban mihkhmat ia ki paidbah jong ka Akuluto 31 A/C ha ka kylla kaba ar khlem da don ki nong ia aireng.Nga ainguh ia U Blei halor kane bad pynpaw ruh ka jingsngewnguh ia ki nongkyrshan bad ki nongai mynsiem kumjuh ia ka Akuluto BJP mandal bad ka seng BJP ha Nagaland,” pynpaw u Kinimi lyngba ka twitter.
Ka Nationalist Democratic Progressive Party (NDPP) bad ka BJP ki la ai aireng ha ka ilekshon 2018 lyngba ka jingiabhah seat kaba 40:20, bad kane ka kynhun synrop ha u bnai Naitung jong ka snem ba la dep ka la shim ia ka rai ban bteng ia kane kajuh ka jingiabhah seat bad kajuh ka jingiasngewthuh jingmut na ka bynta kane ka ilekshon assembly ka ban wan ha Nagaland.
Ka NDPP ha u snem 2018 ka la jop 18 seat, ka BJP ka la jop da 12 seat bad thaw ia ka sorkar da ka jingkyrshan jong kiwei pat ki party bad ki kyrtong shimet.
