Shillong, Nailur 13: Ki Village Defence Party (VDP) jong ka Shnong Barato lem bad ki dkhot ka HITO-Barato, kila ioh kem noh ia u koidi uba phet tuh na Jowai District Jail bad uba la iapra la ka jong bad ka kynhun ki 4 ngut kiba shah bomiap ha Shangpung.
Une u Koidi u kyrteng u Rikmenlang Lamare uba dei hi na ka shnong Barato. Ia une u koidi la ioh kem hynne ka step por 11 baje naka Shnong Shaibnai, West Jaintia Hills District.
Kumban shu pynkynmaw, haduh 6 ngut ki koidi kila phet tuh na Jowai District Jail myn ha ka sngi saitjain bala lah da kaba thombor ia u Warden bad ki pulit pahara.
San ngut na kine ki koidi ba kynthup ia u snar pyniap briew u I Love You Talang kila poi sha ka shnong Shangpung hynrei tang shisngi ba ki phet tuh, saw ngut na ki, kila shah bomiap ha ki paidbhur ka thain Shangpung katba uwei pat ula lait phet da ka sait.
Hynrei ia une u lait phet la ioh pat ban kem hynnin ka sngi nyngkong naka thain Shangpung uba dei ruh u snar pyniap briew ba kyrteng u Ramesh Dkhar.
U Rikmenlang Lamare ula iapra bad ka kynhun u I Love You Talang bad ula phet la ka jong sha ka thain Barato bad ula lait na ka tyrsim jong ki paidbhur ka thain Shangpung.
Ki VDP ka Barato haba ioh jingtip ia ka jingdon u Rikmen ha ka thain, ka kynhun hapoh ka jingalam jong u Secretary Bah Resto Sten uba dei ruh u President ka HITO Barato Aream kila pynlong ia ka jingthwet bad kila ioh kem ia u na ka thain.
Ia une u koidi la aiti biang noh sha ki Pulit ba kin leh ia kaba donkam.
