Nongpoh, Nailar 20 : Ki Pulit ka Nongpoh ha ka miet sngi Ba-ar, kila kem ia 5 ngut ki dkhot ka seng Hynniewtrep National Youth Movement (HNYM) halor ka jingkynnoh ba ki dawa pisa jubor na ki nongniah jong ki kali tourist.
Kane ka kynhun la kynnoh ba kala kam ba ki pynlong ia ka jingtalasi ia ki bar jylla hynrei la kynnoh ba kila dawa pisa pat na ki nongniah kali tourist trai jylla kiba kit ia ki briew kiba wan na shabar ka Jylla.
Kine kiba shah kem ki dei ki nongialam ba hakhmat jong kane ka seng ba kynthup ia u President ka HNYM-Nongpoh Circle Donboklang Kum, Chairman ka Anti-Influx Cell Sparly Syngkli, Working President ka Nongpoh Circle Aiborlang Marbaniang bad ki dkhot Krius Pariong bad u Ricky Tangsang.
Kat kum ka ejahar, kumba arngut ki nongniah kali tourist, kiba dei shibynta jong ka seng ki kali tourist bala ithuh da ka Sorkar ha Meghalaya, la kynnoh ba kila shah pynbor ha ki dkhot ka HNYM ba kin siew pisa ba kit ia ki bar jylla. Kine ki nongniah kali tourist kila leit buh da ka jingujor ha Nongpoh Police Station, ia kaba ki Pulit hadien ba kila lum ia ki sakhi satar, kila kem ia kiba shah kynnoh donkti.
Ka ejahar ka kynnoh ruh ba kane ka kynhun kala dawa pisa hapdeng T.3000 haduh T.6500 na kawei pa kawei ka kali tourist kaba kit ia ki bar jylla kiba wan na shabar ka Jylla.
Ki Pulit kila ialam tian bishar ia kine ki 5 ngut hapoh ka District Court hynne ka sngi haba iadei bad kane ka jingkynnoh dawa pisa.
 halor ka jingkynnoh ba ki dawa pisa jubor na ki nongniah jong ki kali tourist.){kind=link}