Shillong, Nailar 20 : Ka Sorkar Jylla kala rai ban pynsted noh shaid shaid ha kaban pyndep ia ka jingthied jaka na ka bynta ka project ban pynheh ia ka Shillong Airport ha Umroi.
Haba kren sha ki nongthoh khubor ha ka sngi Balang, u Symbud Myntri Rangbah ba khmih ia ka Tnad Transport Bah Sniawbhalang Dhar ula kular ba kan ym don ka jingpynslem na ka liang ka Sorkar, haba pynpaw ba ka Tnad bad ki Ophisar kila trei shitom ban pyndep noh ia ka kam thied jaka.
Ka Sorkar kala mynjur ia ka jingtyrwa ban thied haduh 11.75 acre ka jaka na ka bynta ban pynheh ia ka project, kaba ka jingsiew bai lutksan ka long T.72.17 klur sha ki trai jaka.
Ka Airoort Authority of India (AAI) ka donkam haduh 22 acre ka jaka ban pynheh ia kane ka kad bad ka Tnad iada ri kala mynjur ban ai 10.3 acre da ka jingiateh leave-and-licence.
U Bah Dhar u pyntip ba katba ia ka tender ban pynheh ia ka kad lah dep ban pyllait bad plie, ka kam ka dei ka ban dang aiti.
“Ka Sorkar kan pyrshang ban pyndep noh ia ka kam thied jaka” ula ong.
Kane ka jingpynheh ia ka project ka long ban pynjrong ia ka runway n aka 1829 meter sha ka 2400 meter, kaban pynlah ia ki liengsuin ba heh kum ka Airbus ba kin hiar, ka ban nang pynkhlain ruh ia ki lad pyniasoh sha ki nongbah jong ki Jylla ka Ri.
Ha ka 13 tarik Nailar, ka Iingkashari Meghalaya High Court kala pynrem ia ka jingiaid slem ka project pynheh ia ka Shillong Airport bad bthah ia ki bor ka Sorkar Jylla bad Sorkar Pdeng ba kin pynsted noh ia ki kam khnang ban pynthikna ba yn ah pyndep noh kham kloi kat kaba lah.
