Nongpoh, Lber 27 : Ki Pulit ka Ri-Bhoi District, hynnin ka miet kila ioh ban kem ia 3 ngut ki snar khaii droks ka Nongbah Shillong bad ioh ban kurup palat 140 gram u heroin uba shongdor da ki phew lak tyngka.
Ia kine ki briew la ioh kem ha ka por 7 baje mynmiet na kawei ka Maruti Alto 800 kaba don u nombor ML05-M-7648 bad la ithuh ia ki da u Dilip Mawlong na Nongmynsong, Bijay Thapa na Lad Nartiang bad u Banshngain Kupar Khongdup na Umkdait Nongmynsong.
Kat kum ka jingpyntip ki Pulit, ia kine ki briew la ioh kem ha ka jingpynap shrip hajan Byrnihat Outpost hadien ka jingioh jingtip ba kin don ki nongkhaii droks ki ban wan kit ia u droks na Assam sha Nongbah Shillong.
Ha ka jingtalasi ia ka kali, ki Pulit kila ioh kurup haduh 14 tylli ki synduk sabon bala buhrieh hakhrum ka jaka shong, kiba thep ia ki song heroin.
Ki iathuh ba une u droks u khia haduh 140.37 gram. Ki Pulit kila kurup noh ia une u droks ha ryngkat bad lai tylli ki mobile phone, ka pisa ba T. 4000, lai tylli ki ID card, uwei u thyrnia.
Ki Pulit kila register case ia kine ki laingut ha Byrnihat Police Station hapoh ki kyndon jong ka NDPS Act.
