Shillong, Iaiong 30 : Ki Pulit ka East Jaintia Hills kila ioh ban kem ia uwei u runar kyndang ATM na Haryana, uba donkti ban kyndang bad rong tuh ia ka pisa ba kot T. 9,57,000 na ka kor ATM ka HDFC ba don ha Wapung.
Kat kum ka jingiathuh u Superintendent of Police ka District, ki runar kila kyndang ia kane ka ATM ha ka 14 tarik Iaiong 2026 da kaba pyndonkam ia ka gas cutter.
Halor ka ejahar ba ioh pdiang, ki Pulit kila register ia ka case ha Khliehriat PS Case No, 124(04)2026 hapoh ka kyndon 305/324/331/61.(2)/rt2l3(5) BNS bad ka jingtohkit kala iaid shakhmat.
Ha ka jingtohkit, ki Pulit kila lapksai ia ki runar ba donkti bad dang ha kine ki khyndiat sngi, kila ioh kem ia uwei u briew ba kyrteng u Irsad ba ju khot sin u Rumi (32 snem) ba na Mewat, Haryana bad la iohkem ia u na Tauru da ka jingiarap ki Pulit ka Haryana.
U iathuh ba une u runar u dei u dkhot jong ka kynhun ki runar na Mewat, kiba donkti ha ka jingkyndang ia ki kor ATM ha East Khasi Hills, Ri-Bhoi, East bad West Jaintia Hills bad North Garo Hills.
Ia kiwei ki dkhot la ioh ban kem da ki Pulit ka Ri-Bhoi kat kum ka Umiam Police Station Case No. 20(04)2026 bala pynngat hapoh ka kyndon 30s(a)/331(a) /324(s) / 6t(2)(b)/3(s) BNS.
Lah ban kdew ba ki Pulit ka Ri-Bhoi kila iohkem haduh 6 ngut ki runar ba kyndang ia ka ATM ka MCAB ha Bhoirymbong ba kynthup ia 3 ngut kiba kem na Barpeta, Assam bad 3 ngut na Haryana.
