Nongpoh, Rymphang 28: Ki Pulit ka Nongpoh Police Station, ha ka miet sngi Palei, kila ioh kem ia uwei u suba nongkhaii droks na ka shnong Mawtnum, Ri-Bhoi District hadien ka jingpynap shrip.
Une u briew u dei uba dang thmu ban kiew sha Shillong da kawei ka kali tourist bala buhrieh noh ia u nombor kali.
U Superintendent of Police ka Ri-Bhoi VS Rathore u iathuh ba ki Pulit kila pynieng ia ka jaka talasi kali ha shnong Mawtnum haba ioh jingtip ia ka jingwan iaid lynti une u suba nongkhaii droks. U iathuh ba dei ha ka por 9 baje mynmiet ba ki Pulit kila ioh ban bat ia u na kawei ka kali tourist.
Une u suba nongkhaii droks u kyrteng u Rajat Paul ba 29 snem na Chirang, Assam.
Ha ka jingtalasi, ki Pulit kila ioh ban kurup haduh 36.06 gram u heroin bala song ha ki 3 tylli ki synduk sabon ryngkat ka mobile phone bad ka pisa.
Ia une u briew la register case ha Nongpoh Police Station hapoh ki kyndon ka NDPS Act.
