Shillong, Iaiong 24 : Ki Pulit Special Cell ka East Khasi Hills, kila kem ia uwei u samla Khasi na shnong Umlyngka, Upper Shillong namar ka jingkynthoh ia ka kam pyntriem ha Pahalgam, Jammu & Kashmir bad kyrshan ia ka jingleh ki Lehnoh.
Une u samla u kyrteng u Simon Shylla ba 30 snem ka rta. La kem ia u halor ka jingkynthoh hapoh ka video bala pynmih da ka Northeast Live bad ka jingthoh ha Facebook.
Kat kum ka jingiathuh u Superintendent of Police ka East Khasi Hills Bah Vivek Syiem, une u samla ula ai kyrteng ialade da u ‘Man Shylla’ha kine ki jingkynthoh.
Ula iathuh ba ha ka jingkynthoh ha Facebook, une u samla ula pynpaw ruh ba ki Lehnoh ki dei ban leh kum kane ka juh ka kam pyntriem ia kine ki Jaidbynriew ha ka thain Shatei Lam Mihngi-kaba buh jingma ia ka jingialong kawei bad ka jingiatylli jong ka Ri.
Ki Pulit Special Cell kila wad bad shem ba une u ‘Man Shylla’ u dei uba kyrteng u Simon Shylla ba sah ha Umlyngka.
Ki Pulit kila kurup ia artylli ki mobile phone na u bad kila register case ia u hapoh ka Lumdiengjri Police Station hapoh ka kyndon 113(3)/196(1)(a)/147 BNS.
U pyntip ba ia une u samla yn sa ialam tian bishar lashai ka sngi hapoh ka Iingkashari.
