Shillong, Nailur 05 : Ki Pulit ka East Jaintia Hills kila ioh kem ia uwei u nongkhaii droks ba nabar ka Jylla bad ioh kurup ia u heroin ba khia haduh 252 gram.
Ia une u nongkhaii drok la ioh kem hynne ka sngi Ba-ar da ki Pulit ka ANTF bala ialam da u DySP (HQ) J Myrom, ha ka jingtalasi kali bala pynlong ha Umtyra, NH-06.
Une u Nongkhaii droks u kyrteng u Thangsiammawia Paite bad la ioh kem ia u na kawei ka sumo kamai MZ01-P-2566 kaba wan na Mizoram bad leit sha Shillong, ong u Superintendent of Police ka District Jagpal Singh Dhanoa.
U pyntip ba ki Pulit kila ioh kurup haduh 20 tylli ki synduk sabon kiba thep ia u powder rong stem bad ba khia haduh 252 gram, ia kaba la test ba dei u heroin.
Ia une u briew la register case ha Khliehriat Police Station hapoh ki kyndon ka NDPS Act bad ka jingtohkit mynta kala iaid sahkhmat.
