Tura, Naitung 25: U Nongialam ka seng saiñ pyrthei TMC Richard Marak, ula shah kem ha ki pulit ka Tura halor ka jingkynnoh ba ula donkti ban kynshoit ia ki paidbah ha kaban pynmih ia ka jingkulmar hapdeng ka jingialang jong u Myntri Rangbah ka Jylla Conrad K Sangma bad ki Nongialam Sengbhalang.
Ka kynhun khwan myntoi kala kerkut bad ther maw iaka CM Secretariat ha ka Lah Sngi u Blei, katba u Myntri Rangbah ka jylla u Conrad K. Sangma u dang lum ia ka jingialang bad ki sengbhalang bad kiwei kiwei ki kynhun kiba pynlong ia ka jingiakhih da kaba shah thngan.
Ki pulit kila dep ban kem iaki 19 ngut katkum ka jingioh ia ki Video bapher bapher bad ka jingiohi ia ki sakhi ki satar kiba kynshoit ia u paidbhur.
Hashwa ban pyniasoh bad ka TMC, u Richard udei u Nongialam jongka Youth Congress ka Meghalaya.
U Richard ula shah kem halor ka jingdonbynta ha ka Lah Sngi u Blei ban pynmih iaka huri hura, ia kaba la kynnoh ialam da ka kynhun jongka TMC .
La kynnoh ruh ba u Richard ula donkti ha kaban iasylla ban pynsuki iaka jingiakren bad ban pynmih iaka jingklumar.
U Richard Marak udei ruh u briew uba iajan bha bad u Myntri Rangbah barim ka jylla u Dr. Mukul Sangma uba long mynta u nongialam ka seng TMC.
U Richard ula iakhun iaka MLA Election 2023 na South Tura Constituency pyrshah ia u Conrad K Sangma hynrei ym shim la jop satia ia ka election.
Pule lang ia kane: Shah kem 18 ngut ki dkhot ka TMC & BJP ba pynhuri hura ha Tura kynthup ia 2 ngut ki Kynthei
