Shillong, Naitung 25 : Ka National People’s Youth Front (NPYF) kala niew ia ka jingthombor ki paidbah ia ka Chief Minister Office (CMO) ha Tura ka dei tang ka jingiasylla bymman ban pynthut ia ka jingiakren ba jai jai hapdeng u Myntri Rangbah ka Jylla Conrad K Sangma bad ki Nongmihkhmat ka ACHIK, GHSMC bad kiwei myn ha ak 24 tarik Naitung.
Haba pynrem jur ia kane ka jingjia, ka NPYF ha ka kyrwoh kala ong “ Ka huri hura bad ka jinghiar thma ia ka CMO, Tura, ka dei ka jingiasylla bymman jong kine ki riew bymman”.
“Ngi pynrem jur ia kane ka jinghiar thma, kaba lah ban buh ha ka jingma ia u Myntri Rangbah ka Jylla. Kine ki briew kila wan sha kane ka jaka da ka jingmut ban pynthut ia ka jingsuk” kala ong.
Ka kyrwoh ka ong ba ka jingdawa ia ka winter capital ha Tura ka dei ka jingthrang jong ki paidbah ka Ri-lum Garo bad ka donkam ia ka jingiakren bad ki bor synshar khadar ba kynthup lang ia baroh ki kynhun bapher bapher.
“Ka long kaba pang mynsiem ban iohi ia ki kam khawpud jong ki katto katne ki kynhun pynkulmar shnong, kiba, khlem ka jingsngewkhia lang ia ki paid Garo, kila shim ia ka lynti ban kawang maw ia ka CMO Tura hapdeng ka jingiaang. Kum kine ki kam ki pynti ia ka jingbym khein kor ia ka bha ka miat jong ka Jaidbynriew bad khein poh ruh ia ka jingpyrshang ban wad ia ka jingiapynbeit lyngba ka lynti ba jai jai”.
Ka kyrwoh ka ong ba u Myntri Rangbah ula mynjur ban iakynduh ia kine ki kynhun hajan ka jaka ba shong shah jingit jong kine ki kynhun ba iakhih bad kane hi ka pyni ba u Myntri Rangbah u don shisha ia ka jingsngewkhia.
Nalor kane, ka NPYF kala ong ba ka Ambulance kaba kit ia ki Pulit ba mynsaw ruh kam dei ia kaban shah kawang maw namar ka long kaba kongsan ban iada ia ka jingim bad ai jingiarap ia kito kiba donkam.
Haba dawa ban leh tyngeh ia kine ki nongpynkulmar shnong, ka NPYF kala kyntu ia ki Nongshongshnong ban iai long kiba jai jai bad ban ailad ia ki bor ka ain ba kin trei bad iatreilang kat kaba lah na ka bynta ban iohkem ia kine ki briew ba lehtam.
