Shillong Nailur 06: Ki pulit ka East Khasi Hills kila kem ia u Meban Snaitang ryngkat bad ki 12 ngut kiba ak ne leh kum ki briew jong ka aiñ, hadien ba la ioh kurup ia ki Air Gun na ka kali ka jongki ha ka sngi Thohdieng.
U Meban Snaitang bad kiwei pat kila phong da ki jain ïong, kila shah bat hajan ka Secretariat bad la ioh kurup 5 tylli ki Nitro Air Gun ryngkat ki uniphom rong ïong, katto katne ki walkie-talkie na ki 3 tylli ki kali ki jongu kiba kynthup ia ka Audi, ka Bolero Mahindra bad ka Innova Toyota.
Ia kitei ki air gun la lap napoh jong kitei ki kali, ia kaba la suba jur ba ki lah ban don ia ka jingthmu ban pyntieng ne pynsyier ia ki briew.
U SP ka East Khasi Hills u Bah Vivek Syiem ula ong, “Ha ka por kumba 2.30 mynsngi, la lap ia ki 3 tylli ki kali kiba la pynieng pyrshah ia ka Secretariat bad kine ki kali kidei kiba la tah ïit ïong. Ki pulit na ka SP office kila leit ban khmih ia kine ki kali tah ïit ïong bad kawei ka kali kam shym la don satia ia ka number plate. Kial don 12 ngut ki briew kiba la phong da ki jain ïong. La bthah ia ki pulit
SOT ban leit mardor sha katei ka jaka bad haba khynra ia kine ki kali, ngi lah lap 6 tylli ki magazine, walkie talkie bad 5 tylli ki airgun bad 2 tylli ki air pistol.”
“Ia kine ki briew la ialam noh sha Sadar Police Station ban pyndep ia kaba donkam bad la kurup noh ia kitei ki tiar. Ia mynta hi, ngi dang pynlong ia ka jingkhynra ioh ki dang don shuh shuh kiwei pat ki tiar kiba lah ban long kiba be-aiñ” ula ong.
“Ngin shim ia kane ka case hapoh jongka Sadar PS kum ka jingleh ne ak kum ki briew jong ka aiñ bad hapoh jongka Arms act,” la ong u SP.
Hashwa ban shah rah ha ki pulit, u Meban Snaitang ula ong ia ki nongpathai khubor ba kitei ki tioar siat kiba la ioh kurup kidei ki air gun bad ula buh jingkylli ia ki bor sorkar kiba la kurup noh ia ki, da kaba ong,”Kine kidei tang ki air gun. Hato ka don ka kyndon ain ba ka sorkar Meghalaya kan kurup ia kitei ki air gun?”
