Shillong Nailur 06: Ka Deputy Commissioner jong ka East Khasi Hills ka Kong R.M Kurbah ha ka sngi Thohdieng, kala pynjari da ka kyndon 163 BNSS ha kaba la mana tyngeh ban pynlong ia ka jingiadur masi ne kino kino mrad ha kino kino ki jaka kiba hap hapoh jongka district.
“Kala poi sha ka jingtip jong ka ophis ba kala jur bha ka jingpynlong ia ka jingiadur masi ne kino kino ki mrad khamtam ha ka por ba pynlong ia ki Fete ne kino kino ki tamasa ha ki katto katne ki jaka jong ka East Khasi Hills District. Kumta lada ailad ban pynlong ia ka jingpyniadur masi kan long kum ka jingpynkheiñ ia ka Kyndon 11 jongka Prevention of Cruelty to Animals Act, 1960 bad ruh ka jingpynkhein ia ka hukum jong ka ïingkashari kaba hakhlieh duh jong ka ri ka Supreme Court of India kaba la pynmih ia ka hukum ha kaba iadei abd ka jingiadur masi ha u snem 2014” la ong ka DC.
KA Kong Kurbah kala ong, katkum ka jingpynkup bor hapoh ka kyndon 163 BNSS, kala pynmih ia ka hukum ba la mana tyngeh ban pynlong ia ka jingpyniadur masi ne kino kino ki mrad ha ka East Khasi Hills baroh kawei.
“Kino kino kiba pynkheiñ ia kane ka ka hukum kin shah pynshitom tyngeh katkum ki kyndon aiñ bad namar ka jingdawa kyrkieh ka kam, kumta kane ka hukum kaba la pynmih kan treikam noh mardor hi tad haduh ban da pynbna da kumwei pat” la pynkut ka DC.
