Shillong, Rymphang 19 : Ki Pulit ka East Garo Hills District, kila kem ia uwei u briew napoh ka District halor ka jingkam ha kawei ka video ba u lah ban leh thok ia ki EVM bad haba nion ia uno uno u budam jong ka EVM, ka vote kan leit sha ka BJP.
Une u briew u dei u ba kyrteng u Bolong R Marak ba na Dambo Mrok, Rongjeng. La kem ia u hadien ba u Returning Officer ka Rongjeng Constituency ula ujor sha ki Pulit, ong u Chief Electoral Officer (CEO) Bah FR Kharkongor hynnin ka sngi saitjain.
U pyntip ba ki Pulit kila register case pyrshah ia u ha Rongjeng PS hapoh ka kyndon 171 G jong ka IPC.
U Bolong ha ka 16 tarik Rymphang ula pynsaphriang ia ka video ba kam ba ki EVM ki dei kiba lah ban lehthok.
Ha ka ejahar bala mudui sha u SP ka East Garo Hills, u Returning Officer ula ong ba ha kane ka video ba la pynsaphriang ha ka janmiet jong ka 16 tarik Rymphang, u Bolong ula kam ba ki EVM ki ban pyndonkam ha ka elekshon MLA ka Jylla ki dei kiba la dep lehthok bad kino kino ki vote bala thep kin leit beit sha u kyrtong ka BJP.
Kane ka jingkren kala pyntieng bad pynduh jingshaniah ia ka kor EVM ha ka jingmut jingpyrkhat ki paidbah bad ka dei ruh ka jingialam bakla kaba thmu ban pynbiej ia ki nongthep vote, ong u RO haba kyntu ban leh eiei pyrshah ia une u briew kat kum ki kyndon ain.
