Nongpoh, Naiwieng 21 : Ki Pulit ka Patharkhmah Police Station, Ri-Bhoi, kila ioh ban kem ia uwei u briew uba iaid byrngem siat briew ha ka thain Jirang bad ioh ban kurup ia kawei ka pistol shna hi.
Une u briew ba shah kem u kyrteng u Melan Syngkli jong ka shnong Umkhawai, kaba hap ha Jirang.
Kat kum ka jingiathuh u Superintendent of Police ka Ri-Bhoi, Jagpal Singh Dhanao, ula pyntip ba ki Pulit kila ioh pdiang ia ka shithi na u Tarmal Mawthoh, u nongshongshnong ka Umkhawai ba pyntip ba ha ka 18 tarik Naiwieng 2024, ha ka por kumba 11 baje haduh 12 baje mynmiet, uwei u Melan Syngkli ula wan sha ka iingsah u Suntosh Marbaniang bad byrngem ban siat ia u Balmaw Mawthoh da kaba pyni ruh ia ka pistol.
La pyntip ba une Melan ula byrngem ruh ban siat ia u Santosh Marbaniang bad ia ka kiaw kurim ka kong Twilen Mawthoh da kaba pyniap ia ka pistol shna hi lada ki pyntip sha ki pulit.
Ki Pulit jaba shimkhia ia kane ka kam, kila pynlong mar mar ia ka jingtohkit bad ki Pulit ka District kila leit kem ia u Melan Syngkli bad na ka met jong u, kila ioh ban kurup ia ka pistol shna hi lem bad 4 tylli ki kuli ki bym pat pyndonkam.
Ki Pulit ka Patharkhmah Police Station kila register case ia u Melan Syngkli hapoh ka kyndon 333/351(3) BNS r/ w Sec 25(1A) (1AA)(1B)(a) Arms Act. Ka jingtohkit mynta kala iaid shakhmat.
