Shillong, Nohprah 10 : Ka jingkhynra hapdeng ki Pulit ka Guwahati bad West Jaintia Hills District, kala ioh ban kem ia 6 ngut ki nongtuh kali jong ka kynhun na Assam bad Jaintia bad ioh kurup ruh ia bun tylli ki thuk thuk.
Lai ngut na kine ki nongtuh ki dei na Assam bad la tip kyrteng ia ki da u Md Abdul Hanif Sheikh ba na Jhagrapar, Dhubri District, u Md Rafiq Ali na Arikati, Kamrup District bad u Md Jakir Hussain ba na Seshara, Barpeta District.
Ki Pulit ka Gorchuk Police Station kila ioh ban kem shuwa ia kine ki laingut ha ka jingkhynra ba ki donkti ha ki kam tuh thuk thuk na kylleng ki jaka jong ka thain.
Kine ki laingut kila phla pat ia ka jingdonkti ki briew na Jowai, West Jaintia Hills, kaba pynlong ia ki Pulit ban hiar khynra ha ryngkat ki Pulit ka West Jaintia Hills bad ioh ban kem ia lai ngut kiwei pat, kiba dei ki nongshimti ia kine ki thuk thuk ban pyniaid iew.
Kine ki laingut ba kem na Jowai ki kyrteng u Dibormi Amrynsong bad Tunadahun Matra kiba dei na Kharkhana, West Jaintia Hills bad uwei pat u kyrteng u Rimiki Suchiang ba na Saphai, West Jaintia Hills,
Ha ka jingtohkit, ki Pulit kila ioh ban kurup noh ia lai tylli ki thukthuk na khappud ka West Jaintia Hills bad ka Bangladesh. Kila kurup ruh ia bun tylli ki tiar ba ju pyndonkam ha kaba tuh ia ki thuk thuk kynthup ia 3 tylli ki shabi bad ka khurat.
Kat kum ka jingong jong ki Pulit, kane ka kynhun ki nongtuh ka dei kaba ju pyntriem bha ha ki thain khappud ka Assam bad Meghalaya bad ia ki kali ba tuh, la pyniaid iew sha Bangladesh.
