Kurup ia ka ID ka seng National Hynniewtrep People bad Defence Ministry
Shillong, Rymphang 09 : Ki Pulit ka East Khasi Hills, kila ioh kem ia 5 ngut ki riewkiengatiar kiba rah bad ki pistol ba shna ha ri Russia na ka thain Mawsynram, kaba hap ha East Khasi Hills District hynne ka sngi U Blei.
Kine ki 5 ngut ki kyrteng u Aidonsing Nongsiej (40), Orally Khardewsaw (33), Wanrilang Nongkynrih (33), Mossingstar Nongbri (28) bad Pynshailang Puwein (30), ong ki Pulit.
Ia kine ki riewkiengatiar lah ioh kem da ki Pulit Special Cell /SOT ha ryngkat ki Ophisar ka Mawsynram Police Station haba pynlong ia ka jingtalasi kali ha Mawsynram.
Na kine ki briew, la ioh kurup ia kawei ka pistol ba shna ha Russia bad 4 tylli ki kuli .22, hynriew tylli ki mobile phone, kawei ka EPIC, kawei ka Pan Card, kawei ka ID jong ka seng National Hynniewtrep People bad kawei ka ID jong ka Ministry of Defence.
Lah kurup ruh ia artylli ki kali tourist ba don u nombor ML 15 1319 & ML 05 AA 7184 ha kane ka jingtalasi.
Haba pynthikna ia kane ka jingjia, u Superintendent of Police ka East Khasi Hill Bah Vivek Syiem ula ong ba uwei na kine kiba shah kem u dei uba ki Pulit kila thwet namar ka jingdonkti ha ki kam thok kam shukor ha Lumdiengjri.
Hynrei ula pynshai pat ba ka pistol bala ioh kurup ka dei ka pistol shna hi ym ka pistol ba shna ha Russia.
U pyntip ba ia kane ka case la register mynta ha Mawsynram Police Station. Ka jingkhynra kan nang iaid bad ka jingtohkit ruh ka dang iaid shaid shaid” ula ong.
Haba kylli la kane ki briew ki dei jong kano kano ka kynhun ki runar ba bun paid, u Bah Vivek ula ong “Ia mynta, kam pat don dak satia ia ka kynhun kaba bun. Ka paw ba ki dei tang ki runar kiba leh ia ki kam bymman bapher bapher”.
