Shillong, Iaiong 01 : Ki Pulit Special Cell ka East Khasi Hills, kila ioh ban kem haduh 5 ngut ki nongtuh thuk thuk ba kynthup ia ki nongpyniaid iew ia kine ki kali arshaka sha Bangladesh.
Ia kine ki nongtuh la ioh ban kem ha ka sngi ba-ar na 101 Area bad na Shella.
Kat kum ka jingiathuh u Superintendent of Police ka East Khasi Hills Bah Vivek Syiem, ki Pulit Special Cell kila ioh ban kem nyngkong eh ia 3 ngut ki nongtuh thuk thuk na 101 Area.
Kine ki laingut ki kyrteng u Timus Warbah (30), u Babar Mawblei (26) bad u Synraplang Makri (23) kiba dei na Jirang, Ri-Bhoi District.
Kine ki briew kila pyndonkam ia kawei ka kali Alto kaba iaid kylleng ki jaka ka sor Shillong ban peit ia ki thuk thuk kiba ieng harud surok. Ki Pulit kila kurup noh ia kane ka kali bad kawei ka thuk thuk KTM kaba kila rong tuh hynnin ka step na Malki.
U Bah Vivek u iathuh ba ki Pulit Special Cell kila ioh kem pat sa arngut ki briew ba kyrteng u Meaibor Kharryjja (26) ba na Sohlap, Shella bad u Bakordor Rapmai (24) na Jatap, Shella, kiba ju iarap ban aiti ia ki thuk thuk bat uh sha ki nongthied na Bangladesh.
“Kane ka kynhun ka dei kaba donkti ha kiba bun ki kam tuh thuk thuk ha Shillong. Mynta kine baroh san ngut kila don hapoh ka jingtohkit ki Pulit” ong u SP.
