Shillong, Iaiong 03 : Ki Pulit ka East Khasi Hills kila ioh kem ia 4 ngut ki briew kiba donkti ban pyniap dusmon ia u Bah Omega Myrthong na Mawlaingut, kiba la mait bad khlieh bad ia ki dkhot met hajan ka rud pung Umiam.
Kat kum ka jingpyntipu Superintendent of Police (City) Bah Vivek Syiem, ia ki nongpyniap la lah ban ithuh ha kaba lai ngut la ioh ban kem ha ka 1 tarik Iaiong katba uwei la ioh kem ha ka 2 tarik Iaiong.
Ula iathuh ba ha ka miet 26 tarik Rymphang, u Bah Omega ula shah rahbor bad shah pyniap ha Pomlum View Point bad hadien la mait lyngkhot ia ka met jong u harud jong ka pung Umiam.
Ki Pulit kila ioh kurup hynne ka sngi ia ka Bolero Pik-up bad ia ki jain u Bah Omega da ka jingialam lynti kine ki briew na Dewsaw Krang bad khlaw Nongpathaw.
Ka jingtohkit mynta kala jan dep bad ka jingchargesheet yn sa pyndep noh shen, ong une u Heh Pulit.
U Bah Omega ula jah rngai nala ka shnong naduh ka 26 tarik u Rymphang. Ki Pulit ka Lumdiengjri kila register case ia kane ka jingjah bad ha ka jingiawad, kila lap ia ka khlieh bala kem pyut, bala suba jur ba dei jong une u Rangbah narud ka Pung Umiam. Ia kane ka khlieh la lap ha ka 7 tarik Lber.
Ha ka 8 tarik Lber, ki Pulit kila ioh tam sa ia ki kti na ki artylli ki jaka harud ka pung Umiam bad hadien pat la lap sa ia ka met bala tep mar shiteng ha kane hi ka juh ka thain.
Ia ka metiap la dep leh post mortem ha ka 10 tarik Lber ha Civil Hospital, Nongpoh. Ia kine ki tiar ki tar ba ioh kurup la phah sha ka FSL, Shillong bad CSFL Kolkata ba kin tohkit.
