Shillong, Jylliew 23 : Ki Pulit ka East Khasi Hills, ha ka janmiet sngi Nyngkong, kila ioh kem ia 4 ngut ki nongtuh, kiba jrong kti bad rong tuh ia ki mar ki mata jong ki nong Mumbai kiba wan shangkai sha Jylla.
Kine ki nongtuh ki kyrteng u Chaphrang Nangkiew Sutnga ba 24 snem na Mawblei, u Wanjop Kharumnuid ba 23 snem na Laitkor Nonglum, u Albertstar Kharhujon ba 22 snem na Umphyrnai bad u Michael Nongrum ba 45 snem na Demthring Block A.
Kat kum ka jingiathuh u Superintendent of Police ka East Khasi Hills, Bah Vivek Syiem, kine ki nongtuh kila rong tuh ia ka synduk jong kine ki nongwan shangkai na Mumbai ba don ka pisa T.50,000 lem bad ka IPhone 13 na kawei ka kali Innova kaba pynieng ha ka thain Mawblei.
U iathuh ba kane ka jingjia kala jia hynnin ka miet por 8 baje eiei, ha ka por ba kine ki nong Mumbai ba kynthup ia u Jay Nand Kishore Joshi bad ka Iingka sem lem bad arngut ki shijur ba dang shu iathoh shongkurim, ki dang leit bam ja miet ha ka By the Way Restaurant.
La iathuh ba ynda kila wan phai na kane ka jaka bam, kila shem ba la don ki briew kiba pynpait ia ka iit jingkhang jong ka kali bad kila rong tuh ia ka synduk ba thep ia ka pisa bad ka IPhone.
Ki Pulit kila register ia kane ka case ha Madanrting Police Station bad tang hapoh ka 24 kynta, ki Pulit Special Party ka Madanrting Police Station, kila ioh kem noh ia kine baroh sawngut na Mawblei Block B bad ioh kurup ruh ia baroh ka pisa lem bad ki tiar.
Ka jingtohkit ia kine ki nongtuh kala iaid shakhmat mynta.
